भांगरभूंय | प्रतिनिधी
वास्को, प्रतिनिधी: कांय जाणांच्या वांट्याक अपेसूच येता. हे खेपोय तांकां अपेस येतलें असो थोमणो दाबोळीचे आमदार आनी पंचायत मंत्री मॉवीन गुदिन्हो हांणी काँग्रेसच्या दक्षीण गोंय उमेदवाराक मारलो. पस उमेदवार कॅप्टन विरेयतो फर्नांडीस हांणी काँग्रेस तिकेटीर फाटली विधानसभा वेंचणूक दाबोळी मतदार संघांतल्यान लढयल्ली. मात तांकां आपणें हारयल्लो, अशें तांणी म्हणलें.
भाजपा उमेदवार पल्लवी धेंपो हांच्या प्रचाराची पयली फेरी सोंपिल्ल्यान आतां दुसरे फेरयेक सुरवात जाल्या. बिरेस्तारा तिणें दाबोळी मतदारसंघांत आठ सुवातांचेर भेट दिली. ह्या वेळार मंत्री गुदिन्हो उलयताले. नागरिकां कडेन संवाद सादलो. पल्लवी धेंपो हांणी चिखलेच्या सांतेरी देवीचो आशीर्वाद घेतलो. ह्या वेळार तिचे वांगडा मंत्री गुदिन्हो, भाजपा मंडळ अध्यक्ष संदीप सुद, नगरसेवक विनोद किनळेंकार, आदले नगराध्यक्ष क्रितेश गांवकार, जयंत जाधव, प्रकाश गांवस, चिखलीचे सरपंच कमलाप्रसाद यादव, उपसरपंच ऐश्वर्या कोरगांवकार, जिल्हो पंचायत वांगडी अनिता थोरात आनी हेर कार्यकर्ते हाजीर आशिल्ले.
दाबोळी मतदार संघांत भाजपाचो प्रचार नेटान सुरू जाला. हांगा भाजपाचो नेटाचो वारो सुटला तो पुराय दक्षीण गोंयांत पावला. ह्या वार्याक लागून कांय ठिकाणां बळीश्ट जातलीं, अशें गुदिन्हो हांणी म्हणलें.
ह्या वेळार काँग्रेस उमेदवाराक दोनूय कडेन दारूण अपेस सोंसचें पडटलें. दक्षीण गोंयांत तर ते तिगचे पसून नात. दाबोळी मतदार संघांत भाजपा उमेदवारांचो मतांचो आंकडो बरोच व्हड आसतलो. दक्षीण गोंयांत भाजपा उमेदवार पल्लवी धेंपो भरपूर मतांनी जिखतली,असो विस्वास तांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
