हेली पर्यटनाक चालना दिवंक पर्यटन खात्याचे यत्न

भांगरभूंय | प्रतिनिधी

पर्यटकांचे मागणे प्रमाण हेर मार्गांचेर लेगीत रायड उपलब्ध

पणजी: पर्यटन खातें गोंयांतल्या हेली पर्यटनाक चालना दिवपा खातीर यत्न करीत आसा. केंद्राच्या स्वदेश दर्शन येवजणे खाला पोरणें गोंया बांदिल्ल्या हेलिपॅड सुविधेची देखभाल, वेवस्थापन आनी थंय हेलिकॉप्टर रायड उपलब्ध करून दिवपा खातीर ऑपरेटराची नेमणूक करतले. हे विशीं खात्यान प्रस्ताव मागयल्यात. एजन्सीक हांगा सावन आग्वाद किल्लो, तेरेखोल किल्लो, दुदसागर घसघसो, मोपा विमानतळ आनी पर्तगाळी मठ हांगा हेलिकॉप्टर रायड उपलब्ध करून दिवच्यो पडटल्यो.

निवड जाल्ल्या ऑपरेटराक वेल्या मार्गां बगर पर्यटकांचे मागणे प्रमाण हेर मार्गांचेर लेगीत रायड उपलब्ध करून दितले. पूण हे खातीर गरजेचे परवाने घेवप गरजेचें केलां.

हेलिकॉप्टराची तांक 5 प्रवाशांची वा ताचे परस चड आसप गरजेची आसा. हवामान योग्य आसल्यार ऑपरेटराक वर्सांतल्यान उण्यांत उणें 150 दीस अश्यो रायडी उपलब्ध करून दिवच्यो पडटल्यो. रायडा खातीर ऑनलायन, ऑफलायन बुकींग सुविधा, टोल फ्री क्रमांक आसप गरजेचें आसा. ऑपरेटराक हेलिपॅड सुविधा खाजगी हेलिकॉप्टराक उपलब्ध करून दिवं येता.

ऑपरेटराक हेली पॅड चे सुवातेर मुलभूत सुविधा, सुरक्षा, आपत्कालीन उपाय येवजण उपलब्ध करून दिवच्यो पडटल्यो. ताका तिकेट कावंटर, वेटींग रूम, शौचालय, मेटल डिटेक्टर, पार्कींग, व्हीआयपी लाँज आदीं सुविधा उपलब्ध करून दिवच्यो पडटल्यो.

सरकारी कामां खातीर वापरतल्या हेलिकॉप्टरा खातीर हांगा एक हेलिकॉप्टर पार्कींग सुवात आरक्षीत दवरची पडटली. हे खातीर कसलेंच शुल्क घेवंक मेळचें ना. ऑपरेटराक डीजीसीए आनी हेर खात्याच्या नेमांक पाळो दिवप गरजेचें आसा. हेलिपॅड वाठारांत हेलिकॉप्टर प्रशिक्षण वर्ग, फूड कोर्ट आनी हेर सुविधा सुरू करूंक मेळटल्यो.

ऑपरेटराक पुलीस, उजो पालोवपी दळ, डीजीसीए, भलायकी आनी एफडीएची परवानगी घेवची पडटली. हांगा परवानगे बगर हेर कसलेच उपक्रम राबोवंक मेळचें नात. ऑपरेटराक धा वर्सां खातीर परवानो दितले. परवानो शुल्कांत दर तीन वर्सांनी वाड जातली.

हाचे आदीं जीटीडीसी वतीन 2023 वर्सा हेलिकॉप्टर सेवा सुरू केल्ली. तेन्ना हाचे दर धा मिणटांच्या रायडा खातीर 8 हजार रुपया दवरिल्ले. त्या वेळार ही सेवा पोरणें गोंय ते मोपा आनी दाबोळी विमानतळ मेरेन दिल्ली.