भांगरभूंय | प्रतिनिधी
पणजी : पोरणें गोंय पुलीस स्टेशनांत २०२२ वर्सा मारामारी केल्ल्या प्रकरणांत निलंबनाची कारवाय जाल्ल्या आनी सध्या दुसऱ्या पुलीस स्टेशनांत सेवेंत आशिल्ल्या एका हेडकॉन्स्टेबलान माशेलांत फास्ट फूड स्टॉलाच्या धनयाचेर हल्लो केल्ल्याचो व्हिडीओ मुखार आयिल्ल्यान बरोच बोवाळ जाला. ह्या हल्ल्यांत फास्ट फूड स्टॉलाचो धनी विराज माशेलकार हांकां दुखापत जाली. हे विशीं ३ पुलीस कर्मचार्यां सयत हेर ५ जाणां आड म्हाड्डोळ पुलीस स्टेशनांत गुन्यांव नोंद केला.
वयर जाल्ले मारामारीचो व्हिडिओ सीसीटीव्ही कॅमेर्यांत कैद जाला, तो आतां मुखार आयला. हातूंत विराज हांकां स जाणांनी धरून बडयिल्ल्याचें व्हिडिओंत दिसता. हातूंत पुलीस हेडकॉन्स्टेबल समीर फडते आनी विराज हांचे मदीं पयलीं वाद जाल्ल्याचें दिसता. उपरांत रागान एकल्यान विराजाच्या गळ्याक धरिल्ल्याचें दिसता. मागीर हेर स जाण मेळून विराजाच्या तोंडार आनी हड्ड्यार मुठी मारतना दिसतात. हे घडणुकेंत विराजाक दुखापत जाल्ल्यान हॉस्पिटलांत दाखल केल्लो. उपचारा उपरांत ताका डिस्चार्ज दिल्लो.
हेडकॉन्स्टेबल फडते आनी ताचे इश्ट एके सुवातेर गेल्ले कडेन तांचें थंय कोणा कडे तरी झगडें पेटलें. ही घडणूक विराज हांणी पळयली आनी ती दुकानांत आयले उपरांत कोणाक तरी सांगलीं. हे फडते हांकां कळटकच तिडकीन जाब विचारपाक ते सगले स्टॉलार आयले. थंय ही घडणूक घडिल्ल्याचें थळाव्यांनी सांगलें.
फडते निलंबीत जाल्लो
पोरणें गोंय पुलीस स्टेशनांत शेनवार ६ मार्च २०२२ दिसा सांजेवेळार फडते हांणी माशेलांतल्या एका कावल अड्ड्याच्या धनयाक मारिल्ल्याची कागाळ दाखल जाल्ली. अड्ड्याचो धनी वासू नायक हांकां चवकशे खातीर पुलीस स्टेशनांत हाडून मारिल्ले. तेन्ना थंय हाजीर आशिल्ले पुलीस अधिकार्यान हस्तक्षेप करपाचो यत्न केल्ल्यान फडते हांणी तांचेरूय हात उबारिल्लो, अशें ते कागाळींत नमूद केल्लें. ह्या प्रकरणा उपरांत पुलीस मुख्यालयान गुन्यांव नोंद करून फडते हाका निलंबीत केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
