भांगरभूंय | प्रतिनिधी
काणकोण: न्यायालयाच्या आदेशा वेल्यान काणकोण पालिकेन आतां हेडग्या गोरवांचेर सक्त कारवाय करपाचो निर्णय घेतला. पालिका वाठारांत हेडग्या गोरवांक धरून तांकां गोशाळेंत धाडून दितले अशी म्हायती काणकोणचे नगराध्यक्ष रमाकांत नायक गांवकार हांणी दिली.
हेडगीं गोरवां काणकोण बाजारांत भोंवत आशिल्ल्यान येरादारीक आडमेळीं येता. तशेंच वेपाऱ्यांनी दवरिल्लो म्हाल लेगीत तीं खातालीं. तशेंच गिरायकांनी आपल्या दुचाकीचेर दवरिल्लो म्हाल लेगीत तीं खातालीं. ताका लागून पालिकेन गोरवांक धांवडावन घालपा खातीर 4 मनशांची नेमणूक केल्ली. त्या मनशांक हीं हेडगीं गोरवां आयकनाशिल्लीं.
आतां ह्या हेडग्या गोरवांक मणे हांगासरले गोशाळेंत धाडून दितले. थंयचे गोशाळे कडेन काणकोण पालिकेची कबलात जाल्या अशें रमाकांत नायक गांवकार हांणी सांगलें.
एका गोरवाक लागून गोशाळेक दरेक दिसाचो खर्च म्हूण 150 रुपया गोरवां सांबाळ खात्या वतीन मेळटलो अशी म्हायती नायक गांवकार हांणी दिली. जांणी आपलीं गोरवां बेवारस रितीन सोडल्यांत आनी तीं गोरवां पालिकेन धरल्यार त्या गोरवाच्या धनयाक एक हजार रुपयाचो दंड भरचो पडटलो अशेंय नगराध्यक्ष रमाकांत नायक गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
