भांगरभूंय | प्रतिनिधी
तीन वर्सांतली आंकडेवारी; मुख्यमंत्र्याची लेखी जाप
पणजी: फाटल्या तीन वर्सांत हेल्मेट घालूंक नाशिल्ल्यान 236 दुचाकी चालकांनी अपघातांत आपले जीव व्हगडायल्यात. जाल्यार हॅल्मेट आसून लेगीत 257 दुचाकी चालकांक अपघातांत मरण आयलां. विधानसभा अधिवेशनांत वास्कोचे आमदार कृष्णा साळकार हांणी विचारिल्ल्या लेखी प्रस्नाचे जापेंतल्यान मुख्यमंत्री डॉ. प्रमोद सावंत हांणी ही म्हायती दिली.
2021 ते 2023 ह्या तीन वर्सांच्या काळांत राज्यांत जाल्ल्या विवीध अपघातांनी 492 दुचाकी चालकांक मरण आयलां. तातूंत हॅल्मेट घातिल्ल्या 257 आनी हॅल्मेट घालूंक नाशिल्ल्या 236 जाणांचो आस्पाव आसा अशें मुख्यमंत्र्यांनी जापेंतल्यान स्पश्ट केलां.
फाटल्या कांय वर्सांत राज्यांतल्या रस्तो अपघातांनी व्हड प्रमाणांत वाड जाल्या. हातूंत जीव वचप्यांचे संख्येतूय दरेक वर्सा वाड जायत आसा. वाहन चालकां कडल्यान सेगीत येरादारी नेमांचे उल्लंघन जायत आशिल्ल्यानूच अपघात आनी तातूंतल्या बळींचो आंकडो वाडत आशिल्ल्याची आतां मेरेन दिसून आयलां. 2021 ते 2023 ह्या तीन वर्सांतली आंकडेवारी पळयत जाल्यार हॅल्मेट घाल्ल्या आनी हॅल्मेट घालूंक नाशिल्ल्या दुचाकी चालकांच्या मरणांत वाड जाल्ल्याचें दिसून येता.
गोंयांतले वाडटे अपघात आडावपा खातीर येरादारी पुलीस सेगीत राज्यभर मोहिमो राबयतात. वाहन चालकां मदीं येरादारी नेमां विशीं जागृताय करतात. येरादारी नेमांचें उल्लंघन करप्यां कडल्यान सुदारीत मोटार वाहन कायद्या खाला धा पटीन दंडूय वसूल करतात तरी लेगीत अजून खूबशे दुचाकी चालक हॅल्मेट घालिनासतनाच गतीन वाहन चालयत आशिल्ल्याचें प्रकार मुखार येत आसात.
दुचाकी चालकां खातीर गोंयांत हॅल्मेट घालपाची सक्ती आसून लेगीत खूबशे चालक ताचे कडेन आडनदर करतात. ताका लागून अशा लोकांच्या मरणाचें प्रमाण वाडत आशिल्ल्याचें दिसून येता.
दुचाकी चालकांक मरण
वर्स हॅल्मेट घाल्ले हॅल्मेट न घाल्ले
2021 64 73
2022 94 74
2023 99 89
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
