भांगरभूंय | प्रतिनिधी
पूण थिये भाजपांतल्या भितरल्या राजकारणाचें आव्हान
म्हापशें: थिवी मतदारसंघांत सेगीत तीन फावटी जैतिवंत जावन हॅट्रीक सादपाची आनी आदले उपमुख्यमंत्री दयानंद नार्वेंकार हांच्या विक्रमा कडेन बरोबरी सादपाची संद नुस्तेमार मंत्री नीळकंठ हळर्णकार हांकां आसा. पूण तांचे मुखार काँग्रेस तशेंच आदले आमदार किरण कांदोळकार आनी भाजपांतल्या भितरल्या राजकारणाचें आव्हान उबें आसा.
मंत्री नीळकंठ हळर्णकार हांणी थिवी मतदारसंघाचे तीन फावटीं प्रतिनिधित्व केलां. सात फावटी तांणी ह्या मतदारसंघांतल्यान विधानसभा वेंचणूक लडयल्या. ह्या वेळा ते आठवे फावटी वेंचणुकेंत देंवतले. हॅट्रिके सयत चौथे फावटी आमदार जावपाची संद तांकां आसा. ह्या मतदारसंघांतल्यान हाचे पयलीं फक्त आदले उपमुख्यमंत्री दयानंद नार्वेंकार हांणी हॅट्रीक सादल्या आनी पांच फावटी जैतिवंत जावपाचो विक्रम तांच्या नांवार आसा. नार्वेंकार हे मगोचे तिकेटीचेर पयली वेंचून आयिल्ले. उपरांत काँग्रेस पक्षाचे उमेदवारीचेर चार फावटी जैतिवंत जाल्ले. मंत्री नीळकंठ हळर्णकार हे राष्ट्रवादी काँग्रेस, काँग्रेस आनी फाटले फावटी भाजपाचे तिकेटीचेर वेंचून येवन आमदार जाले.
येता ते वेंचणुकेंत भाजपा वतीन वेंचणूक लडोवपाक ते इत्सूक आसात. पूण सद्याचे राज्यसभा खासदार आनी आदले आमदार सदानंद शेट तानावडे हांचो भाव संदीप शेट तानावडे हे भाजपा वतीन वेंचणूक लडोवपाक इत्सूक आसात. संदीप शेट हे सद्या पीर्णाचे सरपंच आसात. तशेंच खासदार तानावडे हांणी लेगीत आपल्या भावाक तिकेट मेळची म्हूण पक्ष पांवड्यार यत्न चलयल्यात.
हळर्णकार आनी तानावडे हांच्या ह्या भितरल्या राजकारणाक लागून फाटल्या जिल्हो पंचायत वेंचणुकेंत थिवी विधानसभा मतदारसंघांतल्या दोनूय जिल्हो पंचायत मतदारसंघांनी भाजपाक हार खावची पडिल्ली.
आदले आमदार किरण कांदोळकार हांणी सद्या थिवी मतदारसंघाचेर आपलो फोकस केला. फाटले वेंचणुकेंत तांणी ह्या मतदारसंघांतल्यान कोलवाळ जिल्हो पंचायत वांगडी आशिल्ली घरकान्न कविता कांदोळकार हांकां अखील भारतीय तृणमूल काँग्रेसी वतीन वेंचणुकेंत देंवयिल्ली आनी स्वता हळदोणें मतदारसंघांतल्यान तृणमूल काँग्रेसीचे उमेदवारीचेर वेंचणूक लडयिल्ली. ह्या दोनूय मतदारसंघांनी तांकां हार स्विकारची पडिल्ली. हे फावटी जिल्हो पंचायत वेंचणुकेंत कोलवाळ मतदारसंघांतल्यान कविता कांदोळकार ह्यो दुसरे फावटी जैतिवंत जाल्यात. तृणमूल काँग्रेसीक सोडचीट दिले उपरांत किरण कांदोळकार हांणी खंयच्याच राजकी पक्षांत प्रवेश केल्लो ना. सद्या तरी कांदोळकार हे ह्या मतदारसंघांत वैयक्तीक रितीन राजकी आनी समाजीक कार्य करीत आसात आनी अपक्ष वा एखाद्या राजकी पक्षाचे उमेदवारीचेर वेंचणूक रिंगणांत देंवतले हें वेंचणूक लागीं आयले उपरांतूच स्पश्ट जातलें.
काँग्रेस पक्षा वतीन हे फावटी विधानसभा वेंचणूक लडोवपाक थिवी मतदारसंघांतले ज्येश्ठ काँग्रेस फुडारी आनी थियेचे सद्याचे पंच वांगडी शिवदास कांबळी हे तशेंच सद्याचे शिरसयचे जिल्हो पंचायत वांगडी निलेश कांबळी हे इत्सूक आसात. पक्षा वतीन फाटली वेंचणूक लडोवपाक शिवदास कांबळी हे इत्सूक आशिल्ले. पूण पक्षान उद्देजक अमन लोटलीकार हांकां उमेदवारी दिल्ली. पूण वेंचणुकेंत तांचो कसलोच प्रभाव दिसून येवंक नाशिल्लो. ताका लागून हे फावटी निश्ठावंत आनी वेंचणूक जिखपाची तांक आशिल्ल्या कार्यकर्त्याकूच उमेदवारी मेळची अशी मागणी थिवी गट समितीन काँग्रेस फुडाऱ्यां कडेन करून आदले सरपंच शिवदास कांबळी आनी जिल्हो पंचायत वांगडी निलेश कांबळी हांच्या नांवाक पसंती दिल्या.
2022 चे वेंचणुके वेळार नवो पक्ष आरजीपीन थिवी मतदारसंघांत व्हड प्रमाणांत मतां मेळयिल्लीं. पक्षाचे तेन्नाचे मुखेली तुकाराम (मनोज) परब हांकां लागून आरजीक पांच हजार परस चड मतां मेळयिल्लीं. पूण तुकाराम परब हांणी पक्षांतल्या भितरल्या वादांतल्यान आरजीपी सयत राजकारणांतल्यान संन्यास घेतला. हाका लागून ह्या मतदारसंघांत आरजीचो प्रभाव मात्सो उणो जाला. आम आदमी पार्टीचें कार्य थिवी मतदारसंघांत व्हडलेशें दिसून येना.
थिवी हो मतदारसंघ आठ पंचायत क्षेत्रांत विभागला. हातूंत कामुर्ली, कोलवाळ, रेवोडें, नादोडें, पीर्ण, अस्नोडें, शिरसय आनी थिवी हांचो आस्पाव आसा. बार्देसाक पेडणें आनी दिवचल म्हाला कडेन जोडपी हो मतदारसंघ आसून येरादारी खातीर म्हत्वाचें अशें थिवी रेल्वे स्टेशन आनी गोंय- मुंबय आनी गोंय- बेळगांव हे राष्ट्रीय म्हामार्ग ह्याच मतदारसंघांतल्यान वतात.
गोंयची विजेची गरज भागोवपी पावरग्रीड प्रकल्प, उत्तर गोंयांत वीज पुरवण करपी थिवी वीज उपकेंद्र बार्देस म्हाल आनी दिवचलच्या कांय वाठारांनी उदका पुरवण करपी अस्नोडें उदका शुद्धीकरण प्रकल्प, कोलवाळ आनी थिवी उद्देगीक वसणूक अशें थिवी मतदारसंघांत म्हत्वाचे प्रकल्प आसात. पूण फाटल्या पांच वर्सांत रोजगार निर्मितीचो एकूय प्रकल्प उबो राविल्लो ना. थिवी कान्सा दोंगुल्लेचेर एमआयटी ह्या खासगी शिक्षण संस्थेच्या प्रकल्पाचें बांदकाम सुरू केलां. तरी लेगीत थळाव्या लोकांचो ह्या प्रकल्पाक विरोध आसा.
म्हापशें ते दिवचल ह्या म्हामार्गार थिवी ते अस्नोडें मजगतीं जावपी येरादारी कोंयडेचो प्रस्न अस्नोडें बायपास रस्त्याचें बांदकाम निमाण्या पांवड्यार आसा. पूण थिवी ते शिरसाय मेरेनच्या अशीर रस्त्याचो प्रस्न निकालांत काडप तितलेंच गरजेचें आसा. दर सप्तकांतल्यान येवपी थिवी रेल्वे स्टेशनार थांबो घेवपी पाटना ते गोंय रेल्वे गाडयेक लागून सकाळच्या वेळार शिरसय जंक्शनार जावपी येरादारी कोंयडी, करासवाडो ते कोलवाळ मजगतच्या म्हामार्गा वयलो अपूर्ण सर्व्हीस रस्तो, बेकायदो कावला अड्डे, कोमुनिदाद सुवातेंतलीं घरां, तशेंच बेरोजगारी, रस्त्या कुशीच्या वेवसायीक आस्थापनांचेर कारवायेचो बडगो, कोयर वेवस्थापन हे सारक्यो समस्या थिवी मतदारसंघाक भेडसायत आसात.
———–
बॉक्स
थिवी मतदारसंघ वेंचणुकेतले निकाल. जैतिवंत आनी दुसऱ्या स्थानार आशिल्ले उमेदवार.
1963 ः शंभू पालयेंकार ः (महाराष्ट्रवादी गोमंतक पार्टी)
1967 ः जयसिंगराव राणे ः (महाराष्ट्रवादी गोमंतक पार्टी)
1972 ः पुनाजी आचरेकार ः ((महाराष्ट्रवादी गोमंतक पार्टी)
1977 ः दयानंद नार्वेंकार (महाराष्ट्रवादी गोमंतक पार्टी)
1980 ः दयानंद नार्वेंकार ः (काँग्रेस)
1984 ः दयानंद नार्वेंकार ः (काँग्रेस)
1989 ः विनायक नायक (महाराष्ट्रवादी गोमंतक पार्टी)
1994ः दयानंद नार्वेंकार ः (काँग्रेस)
1999 ः दयानंद नार्वेंकार ः (काँग्रेस)
2002 ः सदानंद तानावडे ः (भाजप)
2007 ः नीळकंठ हळर्णकार ः (राष्ट्रवादी काँग्रेस पार्टी)
2012 ः किरण कांदोळकार ः (भाजप) 10473, नीळकंठ हळर्णकार (राष्ट्रवादी काँग्रेस) 9361 मतां
2017 ः नीळकंठ हळर्णकार (काँग्रेस) 11099, किरण कांदोळकार (भाजप) 10304 मतां
2022 ः नीळकंठ हळर्णकर (भाजप) 9414, कविता कांदोळकार (तृणमूल काँग्रेस) 7363 मतां
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
