हुस्को ते तरणाटे पिळगेचो…..

भांगरभूंय | प्रतिनिधी

आदले पिळगे परस हालींची पिळगी सगले बाबतींत चड हुशार. हें कोण म्हणटा? तर आदली पिळगी. आमच्या तेंपार असलें कांय नासलें रे बाबा, हेंय तांचे आवडीचें वाक्य. कांय प्रमाणांत तथ्य आसा तातूंत. आदल्या तेंपा वयल्या भुरग्यांक, खास करून विद्यार्थ्यांक ज्यो सुविधा मेळूंक नाशिल्ल्यो त्यो आयज मेळटात. विज्ञान- तंत्रज्ञानाची देणगी आशिल्लें इंटरनेट हें एकूच उदाहरण पुरो. सगले बाबतींत चड हुशार हें दुसऱ्या अर्थानूय लागू जाता. फाटल्या कांय दिसांनी आयिल्ल्यो खबरो वाचल्यार हें जाणवतलें. हाचो अर्थ 40 वर्सां पयलीं असले उतावीळ, अतिशाणे, मस्ते, तवनास भुरगेच नाशिल्ले अशें कोण म्हणचोना. चिखले अपघातांत नेण्ट्या भुरग्यान एक घराबो उध्वस्त केलो. कर्नाटकांतलीं आठ नेण्टीं भुरगीं कोलव्यां सांपडलीं. अस्नोड्यां सरपळ्यो झोमून घेवन पळ काडपी, दुचाकी चोरपी दोगूय तरणाटे, घुंवळे वखदां प्रकरणांत सांपडटात तेय चडशे, पिरायेचे तिशी भितरले. बेळगांवांतल्यो तीन चलयो सेल्फी घेतना बुडल्यो….. हाचे पयलींय मोबायल फोन हातांतलो घेतलो म्हूण, नवो घेवन दिना म्हूण, मोबायलाचेरूच आसता म्हूण तापयिल्ल्यान भुरग्यांनी आत्महत्या केल्यात. आवय- बापायच्या हाता भायर गेल्लीं भुरगीं तर जळा- मळा सांपडटलीं… ! हालींची पिळगी चड हुशार म्हणटना वयल्यो गजाली कोणाच्या मनांत नासच्यो. पूण एकूण परिस्थिती पळयत जाल्यार निर्शेणी आयले बगर रावना. भुरग्यांक हालींच्या कांय वर्सांनी इल्ले चडूच स्वातंत्र्य मेळ्ळां. ताचो तांणी बरो वापर करपाक जाय.
पिरायेची 18 वर्सां जाले बगर गाडी चलोवपाचो परवानो मेळना. तरीय सातवे- आठवेंतलीं भुरगीं स्कूटरी चलयतना सर्रास दिसतात. चिखले अपघातांत तर 17 वर्सांचो भुरगो ड्रायव्हींग लायसन नासतना भाड्याची गाडी घेवन चिखले गेल्लो खंय. दोग इश्ट आनी दोग इश्टीणी. गाडयेंत बियरी मेळ्ळ्यात. चुकीचे वाटेन गाडी चलोवन ताणें अपघात केला, तो नशेंत आशिल्ल्याचो दुबाव आसा, अशें पुलीस सांगतात. असोच एक अपघात बार्देसांत कांय वर्सां पयलीं मध्यानरातीं जाल्लो. एकल्याक मरण आयिल्लें. पबांतल्यान येतना ही घडणूक घडिल्ली. हालींच एके चलयेक इश्टा वांगडा घरा येतना अपघातांत मरण आयिल्लें. आधुनिकतायेच्या नांवा खाला थ्रील अणभवपाक आमच्या तरणाट्यांनी हें करपाकूच जाय अशें ना. स्वताचो व्यक्तीमत्व विकास, समाज सेवाय करूं येता. विवीध वैचारीक महोत्सव जातात, थंय वचूं येता. पूण, चडश्यांचो भर मजा करपाचेर. हो नवो ट्रेंड समाजाक घातक थारपाक लागला. पालकांक दुख्ख, पश्चातापाचे भट्टेंत हुलपावंक लागला.
भुरग्यांचेर लक्ष दवरपाक जाय, संस्कार करपाक जाय ही गजाल खरी. पूण तीन चलयो एकठांय येवन लायब्ररींत वतां अशें सांगून आपल्या तीन इश्टां वांगडा भायले भायर सिनेमांक वतात, तेन्ना पालकांक दुबाव तरी कसो मारतलो?…. आनी भुरग्यांचेर एक सारकें लक्ष दवरपूय चुकीचें. तांकां आचार- विचार स्वातंत्र्य आसपाक जाय. पूण म्हणून तांणी आवय – बापायक फटोवप योग्य न्हय. मोगाचेर पोट भरना, येशस्वी संवसार करतलो जाल्यार दोगांयचो सभाव बरो जाय, अर्थीक थीरताय जाय. आयुश्य म्हणल्यार सिनेमा न्हय, जिंदगी इक सफर है सुहाना… म्हणीत भोंवपाक. घुंवळे वखदां विकून झटपट दुडू मेळटा, म्हूण हेर राज्यांतल्यान 19 ते 30 वर्सां पिरायेचे तरणाटे येवन हें वीख विकपाक लागल्यात. हातूंत गोंयकारूय आसात. पयरूच एके कार्यावळींत, गोंयांत फक्त 10 टक्के ड्रग्स धरतात. उरिल्लो 90 टक्के खंय वता, असो प्रस्न एका मानेस्तान उपस्थित केलो. हातूंत तथ्य ना, अशें म्हणपाचें धाडस आमचे सरकारी यंत्रणेक आसा?
कानांत वारें गेल्ले भशेन हालींचीं कांय भुरगीं वागपाक लागल्यांत. दुर्घटना जावं येता अश्या जाग्यांचेर सेल्फी काडपी कितलेशेच भुरगे जीव वगडावन बसल्यात. घरांत सांगिनासतना पळून दुसऱ्या राज्यांनी वचपी, थंय मौज मजा करून घरा परतुपीय आसात. सद्दां सांजवेळार घरा भायर वचून फास्ट फूड खावपीय कमी नात. कांय जाण तर सांजवेळा साडेपांचांक भायर सरून रातीं 10 वरांचेर घरा येतात. नोकरेक गेल्ले भशेन. एकदां संवकळ जाली काय मागीर फुडले जिणेंत हेंच चालू उरता आनी घराब्याक तें मारक थारता. जांकां वायट संवयीं, व्यसनां आसात, पाडे इश्ट, इश्टीणी आसात, तांणी बारीकसाणीन आपल्या फुडाराचो विचार करून पावलां उखलूंक नाका? स्वामी विवेकानंद हांणी तरणाट्यांक सांगलां, भितरल्या आनी भायल्या सभावाचेर नियंत्रण मेळोवन तातूंतल्या दैवी अंशाक जागो करप हें आमचें ध्येय आसचें. स्वामीजी म्हणटात, ते प्रमाण स्वताचेर नियंत्रण दवरल्यार आमी सगलेच उजू मार्गाचेर पावतले!!