भांगरभूंय | प्रतिनिधी
मोगाचो प्रस्ताव न्हयकारिल्ल्याचें तिडकीन केलो हल्लो
हुबळी, खबरां संस्था: कर्नाटकांतल्या हुबळीच्या बीव्हीबी कॉलेज कॅम्पसांत बिरेस्तार १८ एप्रिलाक कॉंग्रेस फुडार्याचे धुवेचो चाकवान खून करपाची घडणूक घडली. हे घडणुकेचो व्हिडिओ सोशल मिडियाचेर व्हायरल जाला. तातूंत आरोपी तरणाटे चलयेचेर चाकवान हल्लो करतना दिसता.
आरोपी तरणाट्यान चलयेचे माने सयत, पोटाचेर चाकवान सात वार केले. ह्या वेळार वार करपी तरणाटोय जखमी जालो. त्या दोगांयकूय हॉस्पिटलांत व्हेलें. हॉस्पिटलांत ते चलयेक मरण आयिल्ल्याचें डॉक्टरांनी सांगलें. पुलिसांनी आरोपीक अटक केल्या.
नेहा हिरेमठ (२१) अशें ते चलयेचें नांव. कॉंग्रेसीचे नगरसेवक निरंजन हिरेमठ हांची ती धूव. बीव्हीबी कॉलेजींत एमसीएच्या पयल्या वर्साची ती शिकताली. आरोपी तेच कॉलेजीचो विद्यार्थी. फैयाज खोंडू नायक अशें ताचें नांव.
तीं दोगांय एकामेकांक पयलीं सावन वळखतालीं. दोगांयची बीसीएच्या काळांत इश्टागत आशिल्ली. चलयेन त्या चल्याचो मोगाचो प्रस्ताव न्हयकारिल्लो. त्या रागान तरणाट्यान चलयेक मारिल्ल्याचें कळटा. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
