भांगरभूंय | प्रतिनिधी
फोंडें: हुंड्या खातीर छळ करून बायलेक आत्महत्या करपाक प्रवृत्त केल्ले खातीर म्हाड्डोळ पुलिसांनी सुजितकुमार राजकिशोर दुबे (२८, रावपी अडकोण – बाणास्तारी, मूळ झारखंड) हाचे आड आयतारा गुन्यांव नोंद केलो. फोंडें म्हालाचे उपजिल्लोधिकारी शुभम नायक हांणी हे विशीं चवकशी करून पुलीस स्टेशनाचेर कागाळ दाखल केल्ली. निरीक्षक योगेश सावंत हांच्या मार्गदर्शना खाला उपनिरीक्षक रश्मी भाईडकार हे विशीं तपास करतात.
मजगतीं, अडकोण – बाणास्तारी भाड्याचे कुडींत रावपी पौर्णिमा दुबे (२८) हिणें ५ मे दिसा आत्महत्त्या केल्ली. तिचो घोव सुजितकुमार हो हुंड्या खातीर तिचो छळ करतालो. हाका लागून तिणें आत्महत्त्या करपाचें पावल उबारलें. लग्न जावन तीन वर्सां जाल्लीं.
उपजिल्हाधिकारी शुभम नायक हांणी हे विशीं चवकशी करपाक सुरू केली. घोवान हुंड्या खातीर छळ केल्ल्याचें तपासांत उक्ताडार आयलें. उपरांत तांणी पुलिशेंत कागाळ दाखल केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
