भांगरभूंय | प्रतिनिधी
मॉवीन गुदिन्होः दाबोळी कोनसो बसकेंत मार्गदर्शन
भांगरभूंय । प्रतिनिधी
मुरगांवः ही लोकसभा वेंचणूक दरेकल्याच्या स्वाभिमानाची. हे वेंचणुकेंत भाजप येस मेळोवन दाखयतलो. आंतरराष्ट्रीय पांवड्याचेर प्रधानमंत्री नरेंद्र मोदी हांकां विश्वगुरू म्हणटात. कारण युक्रेन- रशिया झुजांत भारतियांत मायदेशांत हाडचे खातीर मोदी हांणी म्हत्वाची भुमिका घेतिल्ली. गोंयची उदरगत ही सर्वसामान्यांची आसा. दाबोळी विमानतळ केन्नाच बंद पडचो ना. दाबोळी बंद पडटलो, अशें सांगून काँग्रेस फुडारी लोकांची दिशाबूल करता. दाबोळीच्यान सुरू जाल्लो प्रचार दक्षिणेंत पल्लवी धेंपो हांकां जैतिवंत करतलो. गोंयांत 50 टक्के महिला आरक्षण दिवन प्रधानमंत्री मोदी हांणी बायलांचो सन्मान केला, अशें दाबोळीचे आमदार तशेंच पंचायत मंत्री मॉवीन गुदिन्हो हांणी सांगलें.
दक्षीण गोंयची भाजप लोकसभा उमेदवार पल्लवी धेंपो हांचो प्रचार नेटान चल्ला. मुरगांव म्हालाचे पालकमंत्री मॉवीन गुदिन्हो हांणी पक्ष कार्यकर्त्यांच्यो बसका आनी कोनसो बसकांचेर चड लक्ष केंद्रीत केलां. दाबोळी मतदारसंघांतल्या वाडेनगरांतल्या श्री गणेश संस्थानाच्या वाठारांत मुरगांवचे नगरसेवक विनोद किनळेकार हांच्या फुडारपणा खाला कोनसो बसका जाली. ह्या वेळार मंत्री गुहिन्हो उलयताले.
दरेकल्यान देश सेवे खातीर परतून एकदां नरेंद्र मोदी हांकां प्रधानमंत्री करचे खातीर मतदान करप गरजेचें आसा. गोंयांत केंद्र सरकारा वतीन साबार उदरगतीचीं कामा चालीक लागल्यात, फुडारांत आनीक कामां जातलीं. दाबोळा विमानतळ हो दक्षिणेंतूच उरतलो. दाबोळी विमानतळ वतलो, अशें सांगून विरोधी पक्ष लोकांच्या मनांत भाजप विरोधी प्रचार करता, अशें गुदिन्हो हांणी सांगलें.
पुराय गोंयांत दाबोळी मतदारसंघ हो उदरगतीच्या कामांचो बालेकिल्लो. गोंयांत उदरगतीच्या कामां वांगडाच साबार येवजण्यो सर्वसामान्यां खातीर चालीक लावन भाजप सरकारान सर्वसामान्यांचें हीत सांबाळ्ळा, अशें नगरसेवक विनोद किनळेकार हांणी सांगलें.
ह्या वेळार दाबोळी भाजप गट अध्यक्ष संदीप सूद हांचें मार्गदर्शन करपी भाशण जालें. ह्या वेळार माचयेर मुरगांवचे आदले नगराध्यक्ष क्रितेश गांवकार, आदले मुरगांव म्हाल भंडारी समाजाचे अध्यक्ष मंगलदास नायक, तुळशीदास पटेकार, संदीप आचरेकार, दिगंबर आमोणकार, चिखलीची उपसरपंच ऐश्वर्या कोरगांवकार, सुनील मडगांवकार, निहाल केणी, आदले नगरसेवक गौरीश म्हार्दोळकार आनी हेर मानेस्त हाजीर आशिल्ले. महेश नावेलकार हांणी सुत्रसंचालन केलें जाल्यार प्रकाश गांवस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
