भांगरभूंय | प्रतिनिधी
पणजी, प्रतिनिधी : गोंय दिसान दीस तापत आसा. वताचो रखरख सोंसपा भायलो जाला. राज्यांत गरमी नेटान वाडतूच आसा. बिरेस्तारा राज्यांतल्या विंगड विंगड भागांनी चडांत चड ३४ ते ३६ अंश सेल्सिअस तापमानाची नोंद जाली. तशेंच फुडले सात दीस तापमान ३४ ते ३६ अंशा मजगतीं उरतलो अशी शक्यताय हवामान खात्यान उक्तायल्या.
तशेंच जाणवपी तापमान म्हळ्यार ‘हिट इंडेक्स’ ४० ते ५० अंश सेल्सिअस उरपाची शक्यताय आसा. ताका लागून नागरिकांनी घरा भायर सरतना जतनाय घेवपाची गरज आसा.
हवामान खात्यान दिल्ले म्हायती प्रमाण, १९ ते २१ एप्रील मजगतीं राज्यांतलें वातावरण उश्ण आनी दमट आसतली अशी शक्यताय आसा. मात उश्णतायेच्या ल्हाराची शक्यताय ना. गोंय सारक्या दर्याच्या प्रदेशांत चडांत चड तापमान ३७ अंश वा ताचे वयर गेलें जाल्यार उश्णतायेचें ल्हार आयिल्ल्याचें जाहीर करतात. तशेंच चडांत चड तापमान सामान्य तापमाना परस ४.५ ते ६.४ अंशान वाडलें तरीय उश्णतेचें ल्हार आयिल्ल्याचें सांगतात.
मजगतीं, दाबोळे शुक्रारा चडांत चड ३४.६ अंश जाल्यार पणजे ३४.४ अंश सेल्सिअस तापमानाची नोंद जाली. पणजे सामान्य उण्यांत उणें तापमान २.३ अंश सेल्सिअसान वाडून २७.६ अंश सेल्सिअस जाल्लें. आयज आनी फाल्यां वातावरण दमट आशिल्ल्याची शक्यताय आसा. मात खात्यान पावसाची शक्यताय उक्तावंक ना. खात्यान राज्यांत २२ ते २५ एप्रील मजगतीं वातावरण सुकें उरपाची शक्यताय उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.