भांगरभूंय | प्रतिनिधी
बोरये – सांकवार दुचाकीक ट्रकान दिल्लो धपको
फोंडें: सांकव-बोरी हांगा 2 मार्च दिसा अनवळखी वाहनाचो धपको बसून जखमी जाल्ले नारायण नायक (बोरी) हांकां उपचार सुरू आसतना आयतारा रातीं मरण आयलें. दोतोरांक आपअपघातांत रस्त्यार कोसळिल्ल्याची फटीची म्हायती दिल्ल्याचें 9 मार्च दिसा उक्तडार आयलें. उपरांत आयतारा रातीं उपचार सुरू आसतना नारायण नायक हांकां मरण आयिल्ल्यान फोंडें पुलिसांनी चवकशी करून ‘हीट अॅण्ड रन’ चो गुन्यांव नोंद केला.
पुलिसांनी दिल्ले म्हायती प्रमाण 2 मार्च दिसा नारायण नायक हे दुयेंत आशिल्ल्यान पूत प्रणव नायक हो तांकां दोतोरा कडेन घेवन वतालो. बोरये सांकवा कडेन पावतकूच फोंड्यां वचपी एका अनवळखी ट्रकाचो धपको दुचाकीक बसून दोगूय रस्त्यार पडले. जखमी जाल्ल्या बापायक आनी पुताक रोखडेंच उपजिल्हो हॉस्पिटलांत दाखल केले. दोतोरांक आपअपघातांत रस्त्यार पडून जखमी जाल्ल्याची म्हायती दोगांनीय दिली. दोतोरांनी उपचार केले उपरांत दोगांकूय घरा धाडून दिलो.
5 मार्च दिसा नारायण नायक हांचे तकलेंत दुखूंक लागिल्ल्यान तांकां बांबोळे गोमॅकाँत दाखल केलो. पूण 9 मार्च दिसा नारायण नायक हांचे तकलेक रस्त्यार पडिल्ल्यान गंभीर जखम जाल्ल्याचें उक्तडार आयले उपरांत दोतोरांनी फोंडें पुलिसांक म्हायती दिली. उपरांत अनवळखी वाहनाचो धपको बसून दोगूय रस्त्यार पडून जखमी जाल्ल्याचें उक्तडार आयलें.
नारायण नायक हांचेर गोमॅकाँत उपचार सुरू आसतना आयतारा रातीं तांकां मरण आयलें. हवालदार आनंद नायक आनी निरिक्षक तुषार लोटलीकार हांच्या मार्गदर्शना खाला अपघाताचो पंचनामो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
