भांगरभूंय | प्रतिनिधी
म्हापशें, प्रतिनिधी ः शिरसय ग्रामपंचायती मुखार चलत वचपी राजेंद्र धोंडिबा चव्हाण (४२, रा. मार्डी, सातारा महाराष्ट्र) हाका धपको दिवन वाहनां सयत घडणुके सुवाते वयल्यान पळून गेल्ल्या अभिषेक मनीष वर्मा (२८, रा. जमशेदपूर झारखंड) हाका कोलवाळ पुलिसांनी अटक केली. तशेंच तो चलोवपी रेन्ट अ कॅब कार जप्त केली. ह्या हीट अँड रन अपघातांत राजेंद्र धोंडिबा चव्हाण हाका जाग्यारूच मरण आयिल्लें.
हो अपघात बुधवारा १० एप्रिलाक दनपरां सुमार ३ वरांचेर घडलो. अपघाताची म्हायती मेळटांच कोलवाळ पुलिसांनी घडणुके सुवातेर येवन पंचनामो केलो. तेन्ना गाडयेचो तुटिल्लो सायड मिरर सांपडलो. हाचे वयल्यान हो अपघात हिट अँड रन आशिल्ल्याचें पुलिसां कळ्ळें.
शिरसयच्यान अस्नोड्या वटेन वचपी कार चालकान चलत वचपी चव्हाण हाका धपको दिल्या उपरांत ताका वैजकी मजत वा पुलिसांक ताची म्हायती दिनासतना थंयच्यान पळ काडिल्ल्याची म्हायती पुलिसांक मेळ्ळी. उपरांत पोलीस निरीक्षक विजय राणे हांच्या मार्गदर्शनाखाला उपनिरीक्षक विष्णू जाधव, सुभाष गांवकार, हवालदार हरेश रेडकार, रामा नायक, प्रताप सावंत, सिताराम चोडणकार, पांडुरंग नायक, कॉन्सटेबल सदाशिव परब, आदीत्य गांवस, दत्ता गांवस, प्रवीण पाटील, संदीप मळीक आनी गृहरक्षक रितेश गांवस ह्या पंगडान शिरसय ते अस्नोड्या मजगतींच्यो सीसीटिव्ही फुटेजी तपासल्यो. तशेंच विस्वासू सुत्रां कडल्यान मेळ्ळी तेन्ना ह्या अपघाताक जीए ०८ व्ही ७७८३ क्रमांकाची बालेनो ही रेन्ट अ कॅब कार कारणीभूत आशिल्ल्याचें कळ्ळें.
ही कार अस्नोडेंच्या हॉटेल महिद्रा क्लबाच्या वाठारांत आशिल्ल्याची म्हायती मेळटांच पुलिसांनी ही कार जप्त केली. तशेंच हॉटेलांत दुबावीत आरोपी कार चालक अभिषेक वर्मा हाका पुलिसांनी ताब्यांत घेतलो आनी ताचे आड गुन्यांव नोंद करून ताका अटक केली.
मजगतीं, हे गाडयेंत अपघाता वेळार दुबाविताचे आवय, बापूय आनी भयण प्रवास करताली, अशी म्हायती मेळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
