भांगरभूंय | प्रतिनिधी
फोंडें, प्रतिनिधी ः गांजे-उसगांवां अनवळखी गाडयेचो धपको बसून बाबल गणपत गावडे (21, आंबेली – सत्तरी) हो स्कुटर चलोवपी गंभीर जखमी जालो. ह्या प्रकरणांत फोंडें पुलिसांनी सोमारा रातीं अनवळखी वाहन चालकाचेर गुन्यांव नोंद केलो. 11 सप्टेंबराक हिट अँड रन हो अपघात जाल्लो. अपघातांत गंभीर जखमी जाल्लो स्कुटर चलोवपी बाबल हाचेर जीएमसींत उपचार सुरू आसात. फोंडें पुलीस अनवळखी गाडयेचो सोद घेतात.
11 सप्टेंबराक सकाळीं 11 ते 12 वरां मजगतीं बाबल गावडे जीए-04-पी-4789 ह्या क्रमांकाची स्कुटर घेवन उसगांवच्यान वाळपय वटेन वतालो. गांजा पावतकच अनवळखी गाडयेन धपको दिल्ल्यान स्कुटर चालक गंभीर जखमी जालो. थळाव्या लोकांनी जखमी जाल्ल्या बाबल हाका खाजगी वाहनांतल्यान पिळये प्राथमीक भलायकी केंद्रांत व्हेलो. ते उपरांत ताका फुडल्या उपचारा खातीर जीएमसींत धाडलो. जखमींची स्थिती गंभीर आसा.
मजगतीं, सोमारा पुलिसांनी अनवळखी वाहन चालका आड गुन्यांव नोंद केलो. फोंडें पुलीस अनवळखी गाडयेच्या चालकाचो सोद घेतात. हवलदार रघुनाथ गांवस हांणी अपघाताचो पंचनामो केलो. निरिक्षक विजयनाथ कवळेकार हांच्या फुडारपणा खाला फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
