भांगरभूंय | प्रतिनिधी
अलाहाबाद, खबरां संस्था: मोगान लग्न जाल्ल्या जोडप्याच्या घटस्फोटाच्या प्रकरणांत घोवाचे वटेन निकाल दितना अलाहाबाद उच्च न्यायालयान सांगलें, आयज जितल्या सहजपणान मोगान लग्न जातात तितलेच तांचे मदीं वाद निर्माण जातात. हे नदरेन हिंदू लग्न कायद्यांत बदल करपाक जाय.
सध्या हिंदू लग्न कायद्या प्रमाण घटस्फोट मागपी जोडप्यांक घटस्फोटाची याचिका दाखल केल्या उपरांत ६ म्हयने एकठांय रावचें पडटा. न्यायाधीश विवेक कुमार बिर्ला आनी न्यायमूर्ती डोनाडी रमेश हांच्या खंडपिठान, १९५५ वर्सा हिंदू लग्न कायदो केल्लो अशें सांगलें. त्या वेळार लग्न संबंदांतल्या भावनांची आनी आदराची पातळी वेगळी आशिल्ली. तेन्ना आयचे वरीं लग्नां जायनाशिल्लीं. आतां शिक्षण, अर्थीक स्वातंत्र्य, जातीय आडमेळीं मोडप, आधुनिकीकरण आनी अस्तंती संस्कृतायेच्या प्रभावाक लागून लग्नां मदीं जायते बदल जाल्यात. खरें म्हणल्यार समाज चड मुक्त आनी व्यक्तीवादी जाला. भावनीक आदार दिवपाक आतां सुवात ना.
अनवळखी बायलेक ‘प्रिये’ म्हणप लैंगीक छळ : कोर्ट
कलकत्ता उच्च न्यायालयाच्या पोर्ट ब्लेअर खंडपीठान एका खटल्यांत निर्णय दितना म्हणलां, अनवळखी बायलेक ‘प्रिये’ (मोगा, स्वीटहार्ट, डार्लिंग) म्हणप हो लैंगीक छळ आनी ३५४ (ए) १ खाला दंडात्मक गुन्यांव जावन आसा. ह्या प्रकरणांत, आरोपी जनकराम गुप्ता हांणी एके बायल कॉन्स्टेबलाचेर ‘प्रिये, चलान कापपा खातीर आयल्या?’ अशी टिप्पणी केल्ली. हें प्रकरण न्यायालयांत गेलें. न्यायालयान सांगलें, हो फकत पुलीस कर्मचार्याचेरूच न्हय तर खंयचेय बायलेचो लैंगीक छळ जावन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
