भांगरभूंय | प्रतिनिधी
पेडणें, प्रतिनिधी ः हाळी- चांदेल वाठारांत गव्यांक लागून बागायती आनी शेतांचें तशेंच हेर पिकांचें खूब लुकसाण जालां. हें गवें अन्न सोदपाक रानांतल्यान येतात आनी आंबे, काजू, केळीं आदीं पिकांचें लुकसाण करतात. हाका लागून शेतकारांक आनी बागायतींदारांक लाखांनी रुपया लुकसाण जालां.
मोपा विमानतळ बांदल्या उपरांत विमानतळाच्या लागसार आशिल्ल्या जायत्या गांवांतल्या शेतकारांक रानवटी जनावरांचो त्रास निर्माण जाला. जनावरांच्या त्रासाक बेजारुन कांय शेतकारांनी शेती करपूय आतां बंद केलां. गवें आनी हेर जनावरां भाताच्या शेतांचें लुकसाण करतात म्हूण शेतकारांनी आंबे, काजू, केळीं हांची लागवड करपाक सुरवात केली. पूण एकंदरीत पळयल्यार गवें आनी हेर जनावरां तांचीय नासाडी करतात.
हाचें आदींय शेतकारांक अशेंच लुकसाण जातालें. सरकार कडेन कागाळीचे अर्ज करुन लेगीत योग्य कारवाय जावंक ना. दिल्ली लुकसाण भरपाय सामकी ल्हान आसून तातूंत कागदपत्रां आनी प्रवास खर्चूय सुटना अशें शेतकार सांगतात.
हाळी चांदेल गांवच्या रान वाठारा कुशीक तिळारी कालवो आसा. त्या कालव्याचेर आशिल्ल्या पुलांचेर गेटी लायल्यार शेतांत वा गांवांत जनावरां भितर सरची नात. फकत रानवटी जनावरांक लागून शेतकार शेती करप बंद करपाक लागल्यात अशें शेतकार बापू नारुलकार हांणे सांगलें.
मोपा विमानतळ आनी गांवांनी रानां खात्याची जमीन आसा. खात्यान रान वाठारा भोंवतणी पॉवर फेन्सिंग करून जनावरांक भितरुच दवरचें. थंय फोंडकुल मारुन तांच्या उदकाची सोय करची, जाका लागून जनावरां उदक सोदपाक गांवांत भितर सरचीं नात शेतकार नरेंद्र नारुलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
