भांगरभूंय | प्रतिनिधी
आपल्या फुडारपणाखाला गुजरात टायटन्साक पयल्याच हंगामांत आयपीएलाचें वस्तादपण मेळोवन दिवपी हार्दिक पांड्याक आयर्लेण्डाचे भोंवडे खातीर भारताच्या पंगडाचो मुखेली केला. हे भोंवडे वेळार भारताचो मुख्य पंगड इंग्लंडाचे भोंवडेर आसतलो. हाचो अर्थ रोहीत शर्मा आनी ऋषभ पंत आयर्लेण्डाचे भोंवडे खातीर उपलब्ध आसचे नात. ताकाच लागून हार्दिक पांड्याक आयर्लेण्डा आडचे टी-20 माळे खातीर मुखेली केला.
2021तले संवसारीक टी-20 सर्ती उपरांत राष्ट्रीय पंगडांतल्यान भायर आशिल्ल्या पांड्यान अंदूंच्या आयपीएला वरवीं पुनरागमन केल्लें. ताणें गुजरात टायटन्साक पदार्पणाच्या हंगामांत वस्तादपण मेळोवन दिलें.
सध्या दक्षीण आफ्रिके आड चालू आशिल्ले टी-20 माळे खातीर तो उप मुखेल्याची जापसालदारकी सांबाळटा.
मजगतीं, लोकेश राहुल 1 जुलय पसून इंग्लंडा आड सुरू जावपी टॅस्ट मॅची खातीर उपलब्ध आसचो ना. राहुलाक दक्षीण आफ्रिके आड चालू आशिल्ले टी-20 माळे खातीर भारताच्या पंगडाचो मुखेली केल्लो. पूण, माळेक सुरू जावपाक एक दीस बाकी आसतना तो जखमी जालो आनी ताका लागून आफ्रिके आडची पुर्ण माळ ताका चुकली. ते उपरांत पंताक मुखेली आनी पांड्याक उप मुखेली केलो. राहुल अजून पुर्ण बरो जावंक ना.
भारत पोरूं इंग्लंडाचे भोंवडेर गेल्लो. पूण, कोरोनान बायो बबलांत शिरकाव केल्ल्यान भारताक माळेंतली पांचवी आनी निमाणी टॅस्ट खेळपाक मेळूंक नाशिल्ली. ती मॅच आतां 1 जुलयाक जातली.
राहुलाचे गैर हाजेरेंत इंग्लंडा आडचे टॅस्टींत शुभमन गिल डावाची सुरवात करपाक शकता. दुसरो ओपनर मुखेली रोहीत शर्मा आसतलो.
भारतीय टी-20 पंगडः हार्दिक पांड्या (मुखेली), भुवनेश्वर कुमार (उप मुखेली), ईशान किशन, ऋतुराज गायकवाड, संजू सॅमसन, सुर्यकुमार यादव, वेंकटेश अय्यर, दीपक हुड्डा, राहुल त्रिपाठी, दिनेश कार्तिक (विकेटकीपर), युजवेंद्र चहल, अक्षर पटेल, रवी बिश्नोई, हर्षल पटेल, आवेश खान, अर्शदीप सिंग आनी उमरान मलिक.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
