भांगरभूंय | प्रतिनिधी
विखुरिल्ल्या पत्रपानांची बांदावळ करतना अदीं मदीं आदल्या यादींच्या पुरुमेंताचें आयज, फाल्यां कडेन नातें जोडल्यार? मुलाखती दितना ‘चाय पिओ, समोसा खाओ’ केल्यार? रातीं कमी वरां मेज, कदेलांर न्हिदून दीसभर च्यावेचे घोट घेत पत्रकारिता करपी कालय आशिल्ले, आयजय आसात. राज्याचे मुख्यमंत्री जावपाचें सपन पळोवपी गिन्यांनी, गिन्यानाची उपासना करपी राजकारणी आसात. आडमेळ्यांचे सर्तींतल्यान आपले भाव रॉय हांकां फोंडें नगरपालिका वेंचणुकेंत वेंचून हाडपी फोंड्याचे नगराध्यक्ष रितेश नायक हांकां शाबासकी दिवंक फावो.
आदले उपमुख्यमंत्री रमाकांत खलप, दयानंद नार्वेकार आपले पूत श्रीनिवास, अनिश हांकां राजकारणांत हाडपाची उमेद आसतलीच. निर्मलाताई खलप, सुषमा नार्वेकार ह्या आवयांचें बळगें मेळ्ळ्यार श्रीनिवास खलप, अनिश नार्वेकार फुडें वतलेच. निर्मलाताई, सुषमाताई हांची वळख पत्रकारितेंत येतकीच जाली. उत्पल मनोहर पर्रीकर हांची माँ मेधा घरकाराचे पयले विधानसभा वेंचणुकेचीं मतां मेजपां वेळार उत्तर गोंय जिल्लो कार्यालया कडेन समेस्तां मदीं उब्यो रावपी. म्होंवाळ आवाजाच्या मेधाताईंक तांच्या मरणा वेळार आर्गां ओंपपाचो खीण म्हापशेंच्या पत्रकारांचे यादींत आसत? मेधाताई मनोहरबाबांची सांवळी, विरोधी पक्ष फुडारी, मुख्यमंत्र्यांची घरकान्न म्हणून तांचे खातीर चार वळी बरोवपाची संद आमकांय मेळ्ळी. मुखार आशिल्ली मातृदिनाक आपल्या सान भुरग्यांक सोडून गेल्ली एक आवय. उत्पल, अभिजात हांचे आवयक नमन करपाची संद दिवपी संपादक, पत्रकार लक्ष्मण जोशी हांची याद प्रदेश भाजपाक आसा? काँग्रेसींत तेन्ना हायकमांड आशिल्ले, आयजय आसात आनी भाजपांतय गेल्यात. हायकमांड म्हणल्यार श्रेश्ठी, पक्षश्रेश्ठी, एक राजकी पक्षाचे दुसरे राज्य व राष्ट्राचे मुखेली. भोंवतणी कुलेरां, चिक्रपिरयो चणे, भिकणां, चिंगमां, तांचीं नावां विखुरिल्ल्या पत्रपानांनी बरोवया? एकाच धपक्यांत विखुरिल्लीं पत्रपानां बांदून जातलीं? दिसाळ्यांचे बांदावळींत वांटो उखलपी गांवागांवांतले खबराकार, जायरातदार आदले, आतांचे एकठांय जातले? तांचो हावेस कितें?
हावेस बाळगिना जाल्यार फुडारांत पावलां मारतना आडमेळीं येतात. एक विधानसभा वेंचणूक हारल्यार निर्शेत बसून रावना आसतना लोकसभा वेंचणुकांच्या आंगणांत देंवन जैत मेळोवपी पिरायेचे नाबाद 75 तले श्री. खलप, शेतकाममंत्री रवीबाब नायक, पयलींचे मुख्यमंत्री चर्चिल आलेमांव, खासदार फ्रान्सिस सार्दिन राजकारणात अजून धांवतात. एक गजाल खरी राजकारण्यांच्या पिरायेची भासाभास गंभीरतायेन जावपाक लागल्या. लोक प्रतिनिधित्व कायद्यांतच न्हय 60 – 70 वर्सां आदींच्या कायद्यां कडेन पळोवपाचो वावर कोण करतलो? एका पुताक विधानसभे मेरेन पावोवन रवीबाब राजकारणांतल्यान विसव घेत? भलायकीमंत्री विश्वजीत राणे विधानसभे मेरेन घरकान्नी सयत पावले. रितेश, श्रीनिवास, उत्पल, अनिश, योगीराज, मिथील, शांभवी, अनिशाक वाट दाखोवपाची जापसालदारकी घेतना वरिश्ठ एक पावल फाटीं सरत? मार्गदर्शक जायत? बापायच्या आदर्शांतल्यान नवी पिळगी घडटना आदर्शाच्यो नव्यो परंपरा मुख्यमंत्री डॉ. प्रमोद सावंत घालून दित? राजकारण वेवसाय न्हय, राजकारणांत येतना वेवसायाक विसरूं नाका, आमदार निधी सोबितीकरणाचेर खर्च करप समा न्हय, मेळिल्ल्या पयशांतलो कांय वांटो समाजाक दियात, आपले वांगडा समाजाक व्हड करात, घडयात, स्वयंसिद्ध जायात होच तांचो मंत्र आसचो. उंचेलें शिक्षण घेतिल्ले गोंयच्या राजकारण्यांचे मुखारले पिळगेन शिक्षणाक मुख्य सुवात दिवची. राजकारण्यां वांगडा धांवपी पत्रकारांनी समेस्तां कडेन चड पळोवप, हवामान बदलांचीं ल्हारां मेजप, गोंय बुडचें ना, गोंय प्लास्टिकमुक्त जातलें म्हणून रातदीस वावर करपाचो ध्यास घेवचो.
पत्रकारितेंतले नवे पिळगेक कायदे, नेमावळाची म्हायती दितना तांकां, समाजाक अपंगूळ जावपाचे न्हय जाल्यार एकामेकां कडेन उलोवन प्रस्न सोडोवपाचे मार्गदर्शन जावचें. आतांचे पत्रकार अश्टतासांचे पूण व्हडल्या वाटकुळ्या मेजां परस तांकां धाकटुल्या कंपार्टमेटांत, ओंठांतल्या ओंठांत बांदतात. केन्नाय ते एकठांय येतात, दिसाळ्यांतल्या साबार विभागांतल्यांक बराबरीन व्हरपाची जापसालदारकी घेतल्यार भोवमाध्यमी पत्रकारिता अचूक जायत?
दिसाळ्यांत संपादप्यां बराबर, फाटल्या फुडल्यान कोण आसतात? सहाय्यक संपादपी, कार्यकारी संपादपी, वृत्त संपादक, मुख्य उपसंपादपी, पुरवणी संपादपी, उप संपादपी आनी गांवागांवांतले खबराकार. भांगरभुंयंत, सुनापरान्तांतले पयलींचे म्हालगडे आसात? कशे आसतले? कांय विखुरले, प्राचार्यच न्हय जाल्यार हेडमास्तर, राज्य प्रशासन लवादाचे अध्यक्ष जाले. कोंकणीच्या मोगान पत्रकारितेंत आयिल्ले इंग्लेजी वाटेन गेले, रोखडे व्हड जावपाची, मळबाक हात लावपाची मोख केन्ना केन्ना लागणुके पासून पयस व्हरता. तेंच पत्रकारितेंत काल घडलें, आयजय घडटा, फाल्यां घडूंक जायना, एकामेकांची नसाय दिसूंक फावोना म्हणून वाटो निश्चीत करपाच्या वावरांतल्यान वावराची विस्कावणी जाली. गोंयच्या पत्रकारांक तें समजावन सांगपाच्या वावरांतल्यान कांय कुशीक पडले. राजकारणा परस समेस्तांचे प्रस्न म्हत्वाचे, ताची म्हायती दिवपी खबर विशेशणां न लायता दियात. ते खबरेंत मनीस आसचो, दिसचो हाची जतनाय घेयात हें वर्कशॉपांतल्यान (माक्ना सारको करपी न्ही, मनीस घडोवपी) वरिश्ठ पत्रकार उत्तम कांबळे सरांक एक सलाम.
खबरेची विस्कावणी करतना एके खबरेंत कितलीं उतरां आसचीं? खबरेचो माथाळो कसो आसचो? मुख्य खबर कितल्या उतरांची आसची हें शिकोवपी संपादपी आमचे मदीं आसात हाचो अभिमान आमकां आसपाक जाय. दिसाळ्यांतल्या कर्मचाऱ्यांक दिल्लें शिक्षण भोवमाध्यमी पत्रकारितेंतय उपेगी. भोवमाध्यमांत राजकारण्या वरी हायकमांड, लो कमांड आसतलेच. राजकारणांतले हायकमांड संस्कृताये आड झुजपी आसतलेच पूण अती शाणे जाल्यार तांकांय फाटीर बडी मारपी आसतलेच. झुजारी वेगळोचार करतात, सोदतात तेन्ना तें कित्याक घडटा? हाच्यो जापो रोखड्यो सोदून हायकमांड जैतीवांत जायना जाल्यार राजकी पक्षाच न्हय पत्रकारिताय विखुरता. विखुरिल्ल्या पत्रपानांतल्यान राज्यांतल्या साडेतीन दसकांत विखुरिल्ले, नवे, वेवसायीक पत्रकारितेच्यो राजकारणाच्यो काणयो वाचुया.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
