हांसो दुकांनी बदल्लो

भांगरभूंय | प्रतिनिधी

जेन्ना मनशाक मरण येवन ताका ताब्यांत घेता तेन्ना ताचे वांगडा जोडिल्लीं सगळीं नातीं, संबद तुट्टात, त्याच बरोबर काळजाक घाय दिवन वतात.

मनीस संवसारांत जल्माक येतकच उपाट खुशालकाय घेवन येता. मनीस वाडून व्हड जाता आनी एक दीस संवसारांत सगळ्यांक सोडून वता. जल्माक येतनाच देव मनशाचें मरण थारावन ताका संवसारांत धाडटा. मरण हें एक कडू सत, जें मानपाक आवगड लागता. जेन्ना मनशाक मरण येवन ताका ताब्यांत घेता तेन्ना ताचे वांगडा जोडिल्लीं सगळीं नातीं, संबद तुट्टात, त्याच बरोबर काळजाक घाय दिवन वतात. मनीस कसले तरी कार्य करपा खातीर ह्या संवसारांत येता. दर एका मनश्याचें स्वताचें कार्य निश्चित केल्लें आसता. मनीस आपणाचें कार्य पूर्ण जबाबदारींत पाळून दुसऱ्याच्या बरेंपणाक लेगीत ताचो वापर करता, हातूंनच तर ताका समाधान मेळटा.
गोंय आनी गोंयकार. गोंय तियात्राक फामाद जाल्यार गोंयकारांक तियात्र म्हळ्यार तांचें सुख. गोंयकारांक जितलो मोग तियात्राचो, तितलोच उपाट मोग तियात्र नाचपी कलाकारांचो. तियात्र म्हळ्यार समाजाचो हारसो. तियात्रांत देख दिवपी कथानक तशेंच वातावरण बरें करपाक विनोद चड म्हत्वाचें. गोंयात जायते तियात्रीस्त आसात, जे गोंयकारांच्या काळजांनी घर करुन आसता. जेन्ना एक प्रिय कलाकार माची तशेंच तियात्र मोगींक सोडून वता आनी लोकांचें काळीज दुखवता. आपलो जागो रिकामो दवरुन ते कलाकार संवसार सोडून वतात. तियात्र माचयेर जायते कलाकार आपल्या वेगवेगळ्या कलेंतल्यान लोकांचें मनोरंजन करतात. आपलो पूर्ण वांटो दिवन तियात्र गाजयतात आनी लोकांचीं मनां जिखून घेतात.
आयज उगडास करचो म्हळ्यार आमचो गोंयचो तियात्रीस्त, बरोवपी, बरो कलाकार, फामाद कॉमेडीयन मेथ्यूस कुरैय. तांकां सगळे गोंयकार ‘कॉमेडीयन सेल्वी’ म्हूण वळखताले. ह्या फामाद कॉमेडियनान गोंयकारांक पोट दुखसर हासयले, आयज गोंयकारांक तो दुख्ख दिवन गेलो. सेल्वी हे साद्या स्वभावाचे, उपाट काळजाचे, ल्हान भुरग्यांच्या चड मोगाचे. दर एका तियात्रान तांणी वेगळोच आनी आपलेच परेन विनोद करुन, कातारां म्हणून लोकांक हासयले. तियात्रा वरवीं जायते बरे संदेश लोकां मेरेन पावयले. तांकां माचयेर पळयल्यार लोक शिळोणी घालून येवकार दिताले. शिळोण्यो काबार जातकच ताळयांचो गडगड जातालो. तांकां पळ्यल्यार लोकांच्या तोंडार हांसो दिसून येतालो. तांणी लोकांक हासोवपाचें काम बरेतरेन केलें. तांचे असलो बरो कलाकार गोंयकारांक आनी कोंकणी माचयेक उणो जालो. तांच्या ह्या वावराक लागून ते सदांच सगळ्यांच्या काळजांनी जिवे उरतले. तांचे कॉमेडीतल्यान लोकांचें दुख्ख पयस जातालें, भुरगीं धावून तांकां पळोवंक येतालीं. कॉमेडीयन सेल्वी हांणी केल्लो कोंकणी माचये वेलो वावर इतिहासाच्या पानार उगडासाक उरतलो.
तांच्या मरणा लागून लोकांक हांसोवन तांचें दुख्ख विसरपाक लावपी कलाकार उणो जाला. कोंकणी पालकाचो अखंड खांबो तियात्राक ना जाला…. आपलो जागो ते रितो करुन गेल्यात. दुसऱ्यांक खुशाल दवरपाचें तांचे हें कार्य तांणी बरें पाळ्ळें आनी सगळ्यांच्या मनाक मानवले. आयज तांच्या उगडासान तियात्रमोगी गोंयकार दुख्खांत आसात. कॉमेडीयन सेल्वीन कोंकणी माचयेर मान बागोवपा सारकें काम केलां. ह्याच वावराक लागून ते सदांच गोंयकारांच्या काळजांत जिवे उरतले….. मनशान दुसऱ्यां खातीर केल्ल्यो बऱ्यो करण्यो सदांच उगडास उरतात.

क्लिवा फर्नांडीस
7558391608.