हांगच्या बायोमेडिकल कोयराचो विलो लावचो: तुयेंच्या नागरिकांची मागणी
भांगरभूंय | प्रतिनिधी
पेडणें, प्रतिनिधी: तुयें पंचायत वाठारांतल्या डॉन बॉस्को हायस्कूलाच्या फाटल्यान आनी हेर कडेन आशिल्ल्या उक्त्या चिरे खणींचेर बायो मॅडिकल कोयर हाडून उडोवप चालू आसा. हाका लागून फुडाराक भलायकेची समस्या निर्माण जावपाची शक्यताय आसा. अशी कागाळ तुयेंच्या नागरिकांनी प्रदूशण महामंडळ आनी पंचायतीकडेन केल्या. ते प्रमाण पंचायत मंडळ नागरीक आनी प्रदूशण महामंडळ आनी आरोग्य खात्याच्या अधिकार्यानी ह्या वाठाराची पळोवणी केली आनी लोकांच्यो समस्या आयकन घेतल्यो.
तुयें पंचायत वाठारांतल्यो ज्यो चिरे खणी उक्तो आसात तातूंत कोयर घालून त्यो पुरपाची जापसालदारकी कोयर वेवस्थापकीय मंडळाकडेन सरकारान दिल्या. ताका लागून असल्या चिरेखणींचेर कोयर उडोवन त्यो पुरोवपाचो यत्न कोयर वेवस्थापन मंडळ करता. मात हालीं व्हडा प्रमाणांत बायोमेडिकल कोयर ह्या चिरेखणी आनी वाठारांत कोयर उडोवपाची कागाळ तुयेंच्या लोकंनी पंचायत आनी गोंय प्रदूशण महामंडळाकडेन केल्या. ते प्रमाण हांगा जय बायोमेडिकल कोयर उडयला त्या वाठारांची तपासणी अधिकार्यांनी केल्या. हे पळोवणे उपरांत फुडलो अहवाल वरीश्ठ अधिकार्यांक धाडून फुडली कारवाय करतले. मात तुयें पंचायत मंडळ आनी ग्रामस्थांनी हो कोयर आमच्या गांवांत नाका तो बेगोबेग उखलपाची मागणी केल्या.
ग्रामस्थांच्या म्हणण्या प्रमाण, डोंगरांचेर वा जंय चिरेखाणी आसात त्या चिरे खाणींच्या वाठारांत उदकाचें स्त्रोत आसा. शेती बागायती, बांयो, व्हाळ आसात. ताचो वापर शेता वांगडा मनीस आपले सदचे जिणेंत करता. बायो मेडिकलकोयर त्या वाठारांत उडयिल्ल्यान फुडाराक हांगा भलायकेच्यो विवीध समस्या निर्माण जावपाक शकतात. असो भंय नागरिकांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
