भांगरभूंय | प्रतिनिधी
मुंबय, खबरां संस्था ः बायलां आरक्षणाच्या प्रस्नाचेर भाजपान वरळींत ‘जन आक्रोश’ मोर्चा काडलो. ताका लागून बरोच वेळ येरादारी कोंयडी जाली. तेन्ना तिडकिल्ले एके बायलेन महाराष्ट्राचे मंत्री गिरीश महाजन हांकां सगळ्यां मुखार बरोच तापोवन काडलो. हे घडणुकेचो व्हिडियो सोशल मिडियाचेर व्हायरल जाला, आनी आतां राजकी आरोप-प्रत्यारोप सुरू जाल्यात.
संसदेंत बायलां आरक्षण विधेयक (नारी शक्ति वंदन अधिनियम) नामंजूर जाल्ल्याचो निशेध करपाक भाजपान देशभरा प्रमाण वरळींतल्या जांबोरी मैदान ते एनएससीआय डोम मेरेन निशेध मोर्चा काडिल्लो. येरादारी आडकून उरिल्ल्यान सगल्याच रस्त्यांचेर वाहनांच्यो लांब रांको लागिल्ल्यो. येरादारी कोंयडेंत चड वेळ आडकून उरिल्ले एके बायलेचे पासियेंस सोंपलें. शाळेंतल्यान आपल्या पुताक हाडपाक गेल्ली ही बायल गाडयेंतल्यान देंवली आनी मंत्री गिरीश महाजन मिडिया कडेन उलयताले थंय सरळ गेली.
तकली भिरकल्ले हे बायलेन रागान विचारलें, “हांगच्यान चलूंक लागात! तुमकां लागून रस्त्यार कोंयडी जाल्या. तुमकां निशेध करपाचो आसल्यार लागीं मैदान आसा, थंय कित्याक वचनात? सामान्य लोकांक कित्याक त्रास दितात?” मंत्री गिरीश महाजनान तिका शांत करपाचो यत्न केलो, पूण बायलेचो राग उणो जालो ना. “तुमकां कळना? हांगा शेंकड्यांनी लोक आडकल्यात” अशें विचारत ती पुलिसांचेरुय तिडकली.
बायलां आरक्षण राज्यघटना दुरुस्ती विधेयक 17 एप्रीलाक लोकसभेंत न्हयकारलें. हाका लागून विरोधी पक्षांक दोश दिवन भाजपान मुंबयंत हें आंदोलन घडोवन हाडिल्लें. पूण ज्या वर्गाच्या हक्का खातीर हें आंदोलन जालें त्याच वर्गांतले एके बायलेन आंदोलनाचे पद्दतीचेर प्रस्नचिन्न उबें केलें. मजा म्हणल्यार सोशल मिडियाचेर कमेंट करपी चडशे सगलेच ते बायलेक तेंको दितना वाचूंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
