भांगरभूंय | प्रतिनिधी
पणजी, प्रतिनिधी : हवामान खात्यान राज्यांत उश्णताय आनी दमट वाडपाची शक्यताय उक्तायल्या. १८ ते २० एप्रील मजगतीं खात्यान यलो अलर्ट जारी केला. उत्तर कोकणाच्या कांय भागांनी जरी उश्णतायेची शक्यताय आसा तरी ह्या काळांत गोंयांत उश्णतायेची शक्यताय ना हें खात्यान स्पश्ट केलां. राज्यांत १८ एप्रील मेरेन चडांत चड तापमान ३५ अंश सेल्सिअस मेरेन उरपाचो अदमास खात्यान उक्तायला.
मजगतीं, मंगळारा पणजे चडांत चड ३४.६ अंश सेल्सिअस तापमानाची नोंद जाल्या. तापमानांत चडांत चड १.१ अंश सेल्सिअसान वाड जाल्या.जाल्यार उण्यांत उणें तापमान २६.४ अंश सेल्सिअस उरलें. मुरगांवां चडांत चड ३४.४ अंश सेल्सिअस तापमानाची नोंद जाली.
हवामान खात्यान हाचे पयलीं एप्रील ते जून मजगतीं गोंयांत शून्य ते दोन दिस उश्णतायेची शक्यताय उक्तायल्ली.
गोंय सारक्या दर्याच्या वाठारांत चडांत चड तापमान ३७ अंश वा ताचे परस चड गेल्यार उश्णताय वाडिल्ल्याचें जाहीर करतात. तशेंच चडांत चड तापमान सामान्य तापमाना परस ४.५ ते ६.४ अंशान वाडल्यार हाका उश्णतायेचें ल्हार म्हणटात.
१६ ते १८ एप्रील पावसाची शक्यताय
उत्तर कर्नाटक आनी महाराष्ट्रांतल्या मराठवाडो भागांत तयार जाल्ल्या चक्री वादळाक लागून गोंयांत आयज ता.१६ ते बिरेस्तार १८ एप्रील मजगतीं वादळ वार्या सयत पावसाची शक्यताय हवामान खात्यान उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
