भांगरभूंय | प्रतिनिधी
वाळपय, प्रतिनिधी : सुरवातेच्या काळांत हवामानांत सेगीत जाल्ल्या बदलाचो व्हडा प्रमाणांत काजू बागायतीक फटको बसला. आतां फाटल्या दोन दिसां सावन खुबश्या सुवातांचेर घोग्यांनी पडिल्ल्या पावसाक लागून काजीचो मौसम पुरायेन सोंपपाचो भंय काजू उत्पादक उक्तायतना दिसता. हाचो बरोच फटको काजू उत्पादकांक बसतलो. देखून अर्थीक नदरेन खुबश्या काजू उत्पादकांक हाचो बरोच फटको बसपाक शकता. ताका लागून सरकारान काजू दुश्काळ जाहीर करून काजू उत्पादकांक व्हडा प्रमाणांत फाटबळ दिवपाची वेवस्था सरकारान करची अशी मागणी काजू उत्पादकांनी केल्या.
सरकारान फाटबळ दिवंक ना जाल्यार काजू उत्पादकां मदीं बेभरवंशाची परिस्थिती निर्माण जातली. अशें जाल्यार येवपी काळांत काजू उत्पादन मळार हाचे वायट परिणाम जावपाची शक्यताय न्हयकारूं येना. अंदूंचो काजू मौसम ५०% नी देंवो. हें शेतकी खात्यान मान्य केलां.
अंदूं मदींच पावस पडलो. हाचो फटको सरळ काजू उत्पादकांक बसलो. फाटल्या कितल्याशाच वर्सांंचे तुळेंत अंदूं ५० टक्केच काजू उत्पादन जालां. हाका लागून गोंयच्या बाजाराचेर हाचो सरळ परिणाम जाला.
फाटल्या तीन दिसां सावन सेगीत पावस पडटा. हाचोय फटको काजू उत्पादकांक बसला. आजून २५ टक्के काजुचें उत्पादन उरिल्लें. मात मदींच पावस पडिल्ल्यान आजीच्यो बियो पेड्ड्यार जावपाची शक्यताय आसा. तशेंच बाजारांतूय काजू बियांत उण्यांत उणी मागणी आनी ताचें दरूय उणें मेळपाचें आशिल्ल्यान हाचो फटको काजू उत्पादकांक बसपाक शकता.
एका काळार गोंयच्या खुबश्या म्हालांतल्या काजू उत्पादकांचें पोट चलोवपाचें साधन आशिल्ल्या काजू उत्पादकांक असो फटको बसला. ताका लागून गांवगिर्या वाठारांतली अर्थवेवस्था हालपाची शक्यताय निर्माण जाल्या.
गोंयच्या काजू उत्पादकां मदीं वाड जावपाची गरज आशिल्ल्याचें तज्ञांनी म्हणलां. हालींच जाल्ल्या काजू महोत्सवांत आयोजीत चर्चासत्रांत काजू उत्पादनांत गोंय सातवे सुवातेर आसा. जाल्यार केरळ पयले सुवातेर आसा. इतल्या व्हड प्रमाणांत काजू बागायती आसून लेगीत गोंयचो नंबर सातवे सुवातेर येवप ही समाकी अजाप करपा सारकी गजाल जावन आसा. ताका लागून शेतकी खात्यान आतां सक्रीय आनी शिटूक रावप गरजेचें. काजू वेवस्थापन आनी ताची जतनाय घेवपाचे नदरेन शेतकी खात्यान काजू उत्पादकांच्या फाटल्यान खंबीरपणान उबें रावप काळाची गरज जावन आसा. ना जाल्यार येवपी काळांत काजू उत्पादन नांवा पुरतेंच उरतलें, अशी प्रतिक्रया कांय काजू उत्पादकांनी उक्तायल्या.
मजगतीं सध्या काजू उत्पादकांची जाल्ली परिस्थिती हाचो विचार करून सरकारान काजू दुश्काळ जाहीर करप हे काळाची गरज आशिल्ल्याचें खुबश्या काजू उत्पादकांनी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
