भांगरभूंय | प्रतिनिधी
म्हापशें: फाटल्या दोन दसकां सावन मोडपाक पाविल्ल्या हळदोणें मार्केट संकुलाच्या पुनर्विकास प्रकल्पाक सध्या सरकारा वतीन मंजुरी मेळ्ळ्या. पूण ह्या प्रकल्पा वयल्यान परतून आदले आमदार ग्लेन टिकलो आनी सध्याचे आमदार अॅड. कार्लूस फेरेरा हांचे मदीं स्रय घेवपा वयल्यान झूज सुरू जालां.
टिकलो हांणी शेनवारा 30 मार्चाक म्हापश्यां पत्रकार परिशद घेतिल्ली. ह्या वेळार जिल्हो पंचायत वांगडी मनिषा नायक, फ्रँकी कार्व्हावो, सुनील खडे, कार्ल डिसोझा, जॉर्ज डिसोझा हाजीर आशिल्ले.
ह्या वेळार टिकलो हांणी अॅड. कार्लूस हांचेर खर टिका केली. आमदार अॅड. फेरेरा फट उलोवन प्रकल्पाचें स्रय घेवपाक सोदता, असो आरोप तांणी केलो. आपल्याक लागुनूच सरकारा वतीन ह्या प्रकल्पाक तत्वता मान्यताय दिल्ल्याचो दावो हालींच अॅड. फेरेरा हांणी केल्लो. पूण टिकलो हांणी प्रतिदावो करतना सांगलें, आपल्या कार्यकाळांतूच प्रकल्पाक मंजुरी मेळ्ळ्या.
आपल्या कार्यकालांत ह्या प्रकल्पा खातीर फक्त हळदोणें पंचायतीचो ना हरकत दाखलो मेळपाचो उरिल्लो, पूण कोरोना म्हामारी आनी ते उपरांत 2022 चे विधानसभा वेंचणुकेक लागून हातूंत राजकारण हाडलें. ताका लागून आमकां पंचायतीचो ना हरकत दाखलो मेळूंक ना, असो दावो टिकलो हांणी आरटीआय कागदपत्रां सादर करून केलो.
ह्या प्रकल्पाक कळाव जावचो आनी भाजपा सरकार तशेंच आपल्या नांवाची बदनामी जावची, हे खातीर अॅड. फेरेरा हांणी फाटलीं दोन वर्सां प्रकल्प चालूक लावपाक कळाव केलो. सध्या हळदोणें मार्केटाची स्थिती सामकीच बाबत जाल्या. दुर्घटणा जावपाची शक्यताय लेगीत न्हयकारपाक जायना. हे खातीर जिल्होधिकाऱ्यान फुडाकार घेवन हें मार्केट सील करचें, अशी मागणी टिकलो हांणी केली. आमदार अॅड. फेरेरा हे आयज मेरेन लोकांक कडेन फट उलोवन स्वताच्या निश्पाप चेऱ्याचो आदार घेवन ते लोकांची दिशाभूल करतात. काँग्रेस पक्ष ही बुडपी बोट. काँग्रेसीक अजून लोकसभे खातीर उमेदवार सांपडना. आमदार अॅड. फेरेरा हांणी भाजप सरकार आनी मुख्यमंत्र्यांक सल्लो दिवचे परस स्वताच्या पक्षाक सांबाळचो, अशें टिकलो हांणी सांगलें.
अॅड. फेरेरा खेळ्ळे बुरशें राजकारणः टिकलो
कालांतरान अॅड. फेरेरा हे हळदोणेंचे आमदार जाले आनी तांणी प्रकल्पाचे फायलीचेर स्वताची नोट वचपाक जाय म्हूण ह्या प्रकल्पाक चालना दिवपाक कळाव केलो. ह्या काळांत मार्केट कोसळून व्हड दुर्घटणा जाल्ली जाल्यार ताका अॅड. फेरेरा जापसालदार आसपाचे. स्वताक मार्केटाच्या पुनर्विकासाचें स्रय आनी प्रसिद्धी मेळची हे खातीर अॅड. फेरेरा हांणी हें बुरशें राजकारण खेळ्ळे, असोय आरोप ग्लेन टिकलो हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
