भांगरभूंय | प्रतिनिधी
सीआरझॅड विभागाचें केल्लें उल्लंघन
पेडणें: हरमल पंचायत वाठारांत सीआरझॅड विभागाचें उल्लंघन करून भारती रेशे सावन 200 मिटरा भितार बेकायदेशीर केल्लीं बांदकामां सीआरझॅड विभागान न्यायालयाच्या आदेशा प्रमाण मोडपाक कालच्यान सुरवात केली.
एके वटेन अनंत चतुर्दशी निमतान भौशीक गणेशोत्सव विसर्जनाची तयारी आनी सगले गणेश भक्त गणपतीक निरोप दिवपाची तयारी सकाळ सावन करीत आसतना सीआरझॅड विभागान काल (मंगळारा) हरमल पंचायत वाठारांतल्या सीआरझॅड विभागाचें उल्लंघन करून 15 परस चड बांदकामां केल्ल्या बांदकामांचेर कारवाय करपा खातीर कालच्यान सुरवात केली.
गिरकरवाडो हरमला नाथालीना फर्नांडीस आनी फेलिक्स फर्नांडीस हांचीं बांदकामां मोडपाक सुरवात केली.
बांदकामां मोडपा खातीर पेडणेंचे मामलेदार, पुलीस व्हड संख्येन दर्यादेग वाठारांत हाजीर आशिल्ले. एके वटेन पर्यटन वेवसाय वाडीक लागचो हे खातरि सरकार वेंचणुकेच्या वेळार थळाव्यांक वेगळ्यावेगळ्या प्रकारचीं आस्वासनां दिता. पूण चवथ सोंपचे पयलींच बांदकामां मोडपाक सुरवात केल्ल्यान हरमल वाठारांत खवदळ पडला.
बांदकामां मोडपा खातीर भौशीक बांदकाम खात्याचे अधिकारी जेसीबी, 15 मजुराचो पंगड आनी एका ट्रका सयत घडणूक थळार हाजीर आशिल्लो. मुजारांनी रोखड्या रोखडीं बांदकामां मोडपाक सुरवात केलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
