भांगरभूंय | प्रतिनिधी
पेडणें, प्रतिनिधी: हरमल पंचायत वाठारांत दहशतीचें वातावरण निर्माण करपाचो लोकांचे गर्देन यत्न केल्ले खातीर रुपेश नायक आनी सदानंद वायंगणकार हांणी १३ तारखेक कागाळ नोंद केल्ली. मात आजूनय तिची पुलिसांनी दखल कित्याक घेवंक ना असो प्रस्न कागाळदारांनी केला.
विल्सन मास्कारेन्हास ह्या तरणाट्याक कांय जाणांनी जबरदस्तीन पंचायत कार्यालयांत व्हरून म्हायती अधिकारा खाला केल्लो अर्ज फाटीं घेवपाक लायलो. सदानंद आनी रुपेश हांणी हरमलचे आदले सरपंच डॅनियल डिसोजा आनी पंचायत सचिव सुभाष कांबळी हांचे आड ही पुलीस कागाळ केल्या.
कागाळींत म्हणलां, एका नागरिकान म्हायती अधिकारा खाला अर्ज केल्लो. त्या अर्जा विशीं नागरिकांक चुकीची म्हयती दिवन तांचे आड भडकोवपाचो यत्न दोगा- तिगांनी केला. ताका लागून वट्ट २०० नागरिकांनी एकठांय येवन रुपेश नाईक आनी तांच्या कुटुंबीयांक मारपेट करपाचोय यत्न केलो. ताका लागून संबंदीतांचेर पुलिसांनी कारवाय करपाची मागणी कागाळींत केल्ली.
ज्या दिसा ही घडणूक घडली. त्या दिसा २०० परस चड लोक जमा जाले. बामणभाटी- हरमलाच्या विल्सन हाका म्हायती अधिकारा खाला अर्ज बरोवन दिवपाची मदत रूपेश नायक हांणी केल्ली. ते प्रमाण लोक गर्दी करून रुपेश नायक हांच्या घरा गेले. ताचे आवयक धपको दिवन सकयल उडयली. उपरांत रुपेशाचें दुकान जबरदस्तीन बंद करपाक लायलें. विलन्सनाचोच फोन वापरून एकल्यान रुपेशाक धमकी दिली. तेन्ना रुपेश पेडणें शारांत आशिल्लो. ताका लागून रुपेशान धमकेची कागाळ पेडणें पुलीस स्टेशानांत केली. उपरांत रुपेश आनी विन्सनचा इश्ट म्हणून महेश वायंगणकार हांचे भाड्यान चलोवपाक दिल्ली ऑटो दुरुस्ती गॅरेजीचेर २०० लोकांचो मोर्चो गेलो. महेश थंय नाशिल्लो. जबरदस्तीन गॅरेज बंद करपाचो यत्न केलो. सांजेवेळार गांवांतल्या लोकांनी मोर्चांत आशिल्ल्या लोकांक म्हायती अधिकार अर्जा विशीं विचारलें. जाल्यार त्या लोकांक म्हायती अधिकाराचो अर्ज कित्या खातीर आशिल्लो हें खबर नाशिल्ली अशें कागाळेंत म्हणलां.
आदल्या सरपंचाचें स्पश्टीकरण
हरमलाचे आदले सरपंच डॅनियल डिसोजा हांणी स्पश्टीकरण दितना सांगलें, आमी कोणाक कांय करूंक ना, सांगूंक ना. म्हायती अधिकारा खाला अर्ज केल्ले व्यक्ती ताका म्हायती कोणे दिली, ते विचारपाक गेल्ले. ताणें गांवांत कितलीं बेकायदेशीर बांदकामां आसात, कोणाक परवाने दिल्या, अशें अर्जांत विचारिल्लें. हें प्रकरण तेन्नाच मिटलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
