भांगरभूंय | प्रतिनिधी
हरमल: सकयलोवाडो हरमला चवथीच्या काळांत चोरांचो सुळसुळाट वाडिल्ल्यान लोकां मदीं भिरांतीचें वातावरण पातळ्ळां. 17 वेर फांतोडेर अनवळखी चोरांनी सकयल्या वाड्या वेल्या श्रीनारायणदेव देवळाच्या मुखेल दारांतल्यान प्रवेश करून फंडपेटीचें कुलप हत्यारान फोडपाचो यत्न केलो.
पूण देवस्थानांत आशिल्ल्या मायकाच्या स्टॅण्डान कुलप फोडून अदमाशेक रोख दोन हजार रुपया फारायिल्ल्याची म्हायती देवस्थान समितीचे अध्यक्ष तारी हांणी दिली.
चोरांनी फारायिल्ल्या पयशांतले कांय पयशे तीन कडेन पडिल्ले. उपरांत चोरांनी श्रीविठ्ठल रखुमाई देवळांत प्रवेश करून थंयची कांय रोख रक्कम फारायली. हरमल आवट पोस्ट पुलिसांनी पंचनामो केलो. फुडलो तपास पुलीस करतात.
मजगतीं, देवस्थानाचे सीसीटीव्ही कॅमेरे बंद स्थितींत आशिल्ल्यान अध्यक्ष तारी हांणी खेद उक्तायलो. पुलिसांनी सीसीटीव्ही कॅमेरे दुरुस्त करून घेवचें अशें देवस्थान समितीक आवाहन केलें.
सद्या गोंया भायले मजूर लोकांची संख्या वाडिल्ल्यान टेळणी करून फांतोडेर संद सादपाची शक्यताय न्हयकारूं येना. पुलिसांनी रातच्या वेळार पुलीस गस्त वाडोवची आनी दरेक नाक्यार तपासणी करपाची मागणी लोकांनी केल्या. चवथीच्या काळांतूच हे घडणुकेक लागून नागरीक तशेंच बायलां मदीं भिरांतीचें वातावरण पातळ्ळां.
मजगतीं, पेडणेंचे पुलीस निरिक्षक सचीन लोकरे हांणी आवट पोस्टाच्या पुलिसांक मार्गदर्शन करचें आनी हरमल वाठारांत पुलीस गस्त वाडोवन लोकांक थाकाय दिवची अशी मागणी जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
