भांगरभूंय | प्रतिनिधी
हरमल, बातमीदार: फाटल्या चार दिसां सावन सेगीत पडपी पावसाक लागून जायत्या सुवातांचेर उदक सांठून उरिल्ल्यान धोको निर्माण जाला. हरमलाच्या खालचा वाड्या वयल्या पांडुरंग उर्फ सुरेश खवणेंकार हांच्या घराची वणट कोसळून ४० हजारांचें लुकसाण जालें. हे घडणुकेंत कोणाक कांय जावंक ना.
काल रातच्या सुमार ११ वरांचेर वणट कोसळ्ळी. घरा लागसार उदक तुंबून उरता म्हूण ही घडणूक घडिल्ल्याचें तांणी सांगलें. ह्या उदका विशीं फाटल्या वर्सा पंचायत कार्यालयांत लेखी कागाळ दिली, मात पंचायतीन हे विशीं कांयच दखल घेवंक नाशिल्ल्यान आयज म्हाका चाळीस हजारांचें लुकसाण जाल्ल्याचें खवणेकार हांणी सांगलें. ती पुराय रात पडवेर न्हिदून काडिल्ल्याचें तांणी सांगलें.
आपल्या घराची एके वटेनची वणट कोसळ्ळी. मात हेर वण्टींक वेरो गेल्ल्यान आपल्या कुटुंबाक धोको निर्माण जाला. हें घर आनी ताच्यो वण्टी पुर्तुगेज काळांतल्यो आसात. ताका लागून घरा लागसारा उदक सांठून उरप धोक्याचें. म्हणून पंचायतीन उपाय काडपाची गरज आसा, अशें खवणेकार हांणी सांगलें.
पावसाचो आनीक देड म्हयनो उरला. उदक योग्य तरेन सोडूंक नाशिल्ल्यान पुराय घर कोसळपाचे परिस्थितींत आसा. आतां आपल्या कुटुंबान कितें करचें, असो प्रस्न सवाल खवणेकार हांणी केला.
उपजिल्होधिकारी, गटविकास अधिकारी आनी पंचायत समितीन खवणेकार हांच्या घरा कुशीक सांठून उरिल्लें उदक सोडचें आनी ताका मजत करपाची मागणी सध्या जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
