भांगरभूंय | प्रतिनिधी
हरमल, बातमीदार: हरमल पंचायत वाठारांतल्या प्रभाग णवांत पार्सेकरवाडो भागांत आशिल्ल्या मोडिल्ल्या पुला विशीं पीडब्ल्यूडी आनी उदका स्रोत खात्याच्या अधिकार्यां मदीं वाद जाल्ल्यान सरपंच रजनी इब्रामपुरकार तिडकली. ह्या वेळार आमदार जीत आरोलकार हांणी मदीं येवन अधिकार्यांक समजायलें.
फाटल्या सप्तकांत मांद्रें मतदारसंघाचे आमदार जीत आरोलकार हांणी मॉन्सूना आदली बसका घेतली. ह्या वेळार तांणी णवूय पंचायत वाठारांतल्यो समस्या जाणून घेतल्यो. हरमल पंचायत वाठारांतलो पार्सेकरवाड्यार आशिल्ल्या व्हाळा वयल्या पुलाची अवस्था सामकी बाबत जाल्ल्याचें पिडबल्यूडी खात्याच्या अधिकार्यांक निदर्शनाक हाडलें. तेन्ना तांणी हो पूल उदका स्रोत खात्याची जापसालदारकी आशिल्ल्याचें सांगलें. मात सरपंच इब्रामपुरकार हांणी, पुल कोसळून कोणाचोय जीव गेल्यार ताची जापसालदारकी खातें घेतलें व्हय? असो प्रस्न केलो. तेन्ना सगळे अधिकारी ओगीच रावले.
मजगती, हो पूल सामको मोडपाक पावला. सकयल्यो लोखणाच्यो सरयो दिसपाक लागल्यात. पुलाचें कॉंक्रीट गळिल्ल्यान हाची सामकी वायट अवस्था जाल्या.
हे विशीं जिल्होधिकारी नायक आनी आमदार जीत आरोलकार हांणी हस्तक्षेप केलो आनी अधिकार्यांक समजायलें. पेडणें उपजिल्होधिकारी नायक हांणी अधिकार्यांक गरज आसा तें काम करपाक सांगलें आनी पुलाचें काम बेगीनूच हातांत घेवपाचे आदेश दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
