भांगरभूंय | प्रतिनिधी
मुख्यमंत्र्यांचें विधानसभेंत आस्वासन
पणजी: सिकेरी आनी खोर्जुंवें हांगासरल्या जमीन धनयांनी रद्द करिनासतना येवपी हरकत ना दाखलो दिल्यार ह्या मार्गार नवे पूल बांदतले अशें आस्वासन मुख्यमंत्री डॉ. प्रमोद सावंत हांणी दिलें. बिरेस्तारा ते विधानसभेंत उलयताले. हे विशीं आमदार प्रेमेंद्र शेट हांणी लक्षवेधी सुचोवणी उपस्थीत केल्ली.
मुख्यमंत्र्यांनी सांगलें, सिकेरी-खोर्जुंवें हांगासर सद्या एक लोखंडाचो पूल आसा. हो पूल एका खण कंपनीन बांदून दिल्लो. फाटलीं खूबशीं वर्सा खाऱ्या उदकाच्या संपर्कांत आयिल्ल्यान पुलाचे स्टील बीम झरून ताचो आकार उणो जाला. ताका लागून हो पूल दुचाकी तशेंच चलून वचप्यां खातीर घातक थारला. हाका लागून 2019 वर्सा तो बंद केल्लो.
उपरांत जीएसआयडीन 1.40 किमि अंतराचेर नवो पूल बांदिल्लो. पूण तरी लेगीत लोक पोरण्या पुलाचो वापर करतात. काणकोणां लेगीत फक्त अर्द किलोमिटर पयस पडटा म्हूण लोक थंयच्या एका मोडपाक आयिल्ल्या पोरण्या पुलाचोच वापर करीत आशिल्ल्याचें दिसून आयलां. तरी लेगीत आमदार शेट हांची विनंतीचेर विचार करून आमी सिकेरी-खोर्जुंव्यां नवो पूल बांदतले.
ताचे पयलीं आमदार शेट हांणी सांगलें, पोरणो पूल ह्या वाठारांतल्या नागरिकां खातीर विशेश करून शाळेंतल्या विद्यार्थ्यां खातीर फायद्याचो आसा. पूण सद्या तो मोडूंक पाविल्ल्यान घातक स्थितींत आसा. हाचे आदीं हांव आनी आमदार कार्लोस फेरेरा हांणी भौशीक बांदकाम खात्याच्या अधिकाऱ्या बरोबर पळोवणी केल्ली. खात्यान हांगा नवो पूल बांदप शक्य आशिल्ल्याचें सांगिल्लें. पुला खातीर शेतकार जमीन दिवपाक तयार आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
