भांगरभूंय | प्रतिनिधी
म्हापशें: पालिकेच्या कचेरेचें कामकाज ठप्प जालां. सगल्या म्हत्वाच्या दाखल्या खातीरची मान्यताय अर्दवेळ मुख्य अभियंत्याचेर सोंपयल्या. लोकांक साद्या साद्या दाखल्यां खातीर कचेरेंत फावटी मारच्यो पडटात.
शार उदरगत खात्यान म्हापशें पालिकेंत मुखेल पालिका अभियंतो म्हणल्यार पालिका अभियंतो- 1 ची नेमणूक केल्या. ह्या अभियंत्याचेर म्हापशें पालिके सयत उत्तर गोंयांतल्या पेडणें, दिवचल, सांखळी आनी वाळपय ह्या नगरपालिकां मदल्या 1 कोटी रुपयांच्या उदरगतीच्या कामांचे फायलीक तंत्रीक मंजुरी (टीएस) दिवपाची जबाबदारी सोंपयल्या. ह्या अभियंत्या कडल्यान सप्तकांतल्यान दोनूच दीस म्हापशें पालिकेंत बसून वयल्या पांचूय नगरपालिकांच्या उदरगतीच्या कामांच्यो फायली हाताळटात.
तशेंच नळ, वीज जोडणी, भलायकी खात्यां खालचे हरकत ना दाखले, घर दुरुस्ती, महसूल ह्या सारक्या सर्वसामान्य नागरिकांच्या म्हत्वाच्या दाखल्यांच्यो फायली लेगीत ह्याच मुखेल अभियंत्या कडेन मंजुरी खातीर धाडून दितात. प्रत्यक्षांत पालिकेचो अभियंतो- 2 हाणें ह्यो फायली हाताळूंक जाय. पूण त्यो अर्दवेळ आशिल्ल्या मुखेल अभियंत्यांचे मान्यताये खातीर दवरीत आशिल्ल्यान लोकांचे दाखले प्रलंबीत उरतात.
पालिकेच्या अभियंतो विभागाचे मुखेली म्हूण पालिका अभियंतो- 2 कडल्यान संबंदीत कनिश्ठ अधिकाऱ्यां वतीन हे दाखले वितरीत करप क्रमपात्र थारता
नगराध्यक्ष, उपनगराध्यक्ष, नगरसेवक हांचे सयत आमदारां कडेनूय हे दाखले वेळार मेळनात अश्यो कागाळी लोकांनी दिल्यात. पूण तांचेर कसलीच कार्यवाही जायनाशिल्ल्यान लोक कर्मचाऱ्यां कडेन जाप विचारीत आशिल्ल्याचो प्रकार दिसान दीस वाडत आसा. तशेंच अधिकाऱ्यां कडल्यान आपले वयली जापसालदारकी धुकलपाच्या प्रकाराक लागून पालिका कचेरेचें चड करून अभियंता विभागाचे कामकाज ठप्प जालां.
पालिके कडल्यान हरकत ना दाखले वेळार मेळनात अश्यो कागाळी आमचे कडेन आयल्यात. पालिका मुख्याधिकाऱ्यांक विस्वासांत घेवन अभियंतो विभागाचें कामकाज सुरळीत करपा सयत उणाव आशिल्ल्या कर्मचाऱ्यांची भरती करून हे विशीं उपाय काडटले. जेणे करून लोकांची गैरसोय जावची ना.
– प्रभारी नगराध्यक्ष विराज फडके
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
