भांगरभूंय | प्रतिनिधी
भांगरभूंय । प्रतिनिधी
पणजीः हणजूण दर्या देगेर बांदकाम बंदी विभागांत जी बांदकामां चल्ल्यांत ती बेगोबेग बंद करपाचो आदेश मुंबय उच्च न्यायालयाच्या गोंय खंडपीठान दिला. तशेंच ह्या बांदकामाचो वेवसायीक कारणा खातीर उपेग जावचो हाची जापसालदार हणजूण ग्राम पंचायत मंडळान घेवची. बेकायदेशीर बांदकामांचेर कितल्या दिसांत कशे तरेन कारवाय करतले हें प्रतिज्ञापत्रा वरवीं सांगचे असोय आदेश दिला. हे विशींची फुडली सुनावणी 6 डिसेंबराक दवोरल्या.
ह्या बांदकाम प्रकरणात खंडपिठाक मजत करपा खातीर अॅड अभिजीत गोसावी हांची अॅमिकस क्युरी म्हणून नियुक्ती केल्या. हणजुणच्या बांदकाम बंदी विभागांत बांदकामां चल्ल्यांत ती बंद करपाची मागणी करपी याचिका रमेश मुझूमदार हांणी केल्ली. सर्वे नंबर 73-1 हांतूंत सामकीं दर्या देगेर बांदकामां चल्ल्यांत अशें तांणी याचिकेंत नमूद केल्लें. हणजूण पंचायत मंडळ कागाळ करून लेगीत कांय करना हे खातीर याचिका सादर करची पडली अशें मुझूमदार हांणी खंडपिठाक सांगिल्लें.
खंडपिठान बांदकाम बंदी विभागांत चलिल्ल्या बांदकामांची गोंय दर्या वाठार वेवस्थापन प्राधिकरण (जीसीझेडएमए) आनी हणजूण पंचायत मंडलाक पळोवणी करून अहवास सादर करपाक सांगिल्लें. बांदकाम बंदी विभागांत वट्ट 275 बांदकामां आसात असो अहवाल तांणी मंगळाराक खंडपिठाक सादर केल्लो. ह्या बांदकामांचेर कितल्या दिसांत कशी कारवाय करतले हें हणजूण पंचायतीक सांगपाक खंडपिठान सांगलां. बांदकाम केल्ल्यांक 10 दिसांत नोटीस धाडटले आनी जाप दिवपाक सात दिसांची मुजत दिल्या अशें पंचायती वतीन सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
