भांगरभूंय | प्रतिनिधी
म्हापशें, प्रतिनिधी : हणजूण दर्यादेगेर ‘नो डेव्हलपमेंट झोन’ वाठारांत उबारिल्ल्या बेकायदेशीर बांदकामांचेर मुंबय उच्च न्यायालयाच्या आदेशा उपरांत प्रशासनान कारवाय करपाक सुरवात केल्या. ताका लागून आयज ‘गांव बंद’ आंदोलन करून सरकाराचें लक्ष ओडपाचो यत्न केला. ह्या आंदोलनाक आमदार मायकल लोबो, आमदार डिलायला लोबो आनी आरजीपीचे फुडारी मनोज परब हांणी प्रत्यक्षांत हाजीर रावन फांटबळ दिलें. ह्या वेळार परब हांणी लोबो हांकां कांय प्रस्न विचारून टिका केली.
हांगां ‘नो डेव्हलपमेंट झोन’त वट्ट २७८ बेकायदेशीर बांदकामां उबारल्यांत. तातूंत वेवसायूय सुरू केला अशें जीसीझेडएमएन मुंबय उच्च न्यायालयाच्या गोंय खंडपीठांत सांगले उपरांत उच्च न्यायालयान ह्या बांदकामांचेर कारवायेचो आदेश दिला. ते प्रमाण प्रशासकीय यंत्रणेन कारवाय सुरू केल्ल्यान थळाव्यांनी हे कारवायेक खर विरोध केला. हे कारवाये आड आयज सकाळ सावन थळाव्यांनी ‘गांव बंद’ आंदोलन करून सरकाराचें लक्ष ओडून घेतलें.
आमी मुंडकार आमकां सीआरझेड कायदो लागना
खर आंदोलन करतना आंदोलक वेवसायिकांनी, ‘आमी मुंडकार आशिल्ल्यान आमकां सीआरझेड आनी नगरनियोजन कायदो लागू जायना. आमचो एकवट आसा. हें सरकाराक दाखोवपा खातीर आयज ‘गांव बंद’ आंदोलन केलां. लोकसभा वेंचणुके पयलीं ‘सीआरझेड’चो विशय सरकारान सोंपोवचो. ना जाल्यार पुराय गोंयांत भाजपा आड प्रचार करतले.’ अशी शिटकावणी दिली.
आंदोलन करपी वेवसायिकांक आमदार मायकल लोबो, आमदार डिलायला लोबो आनी आरजीपीचे फुडारी मनोज परब हांणी प्रत्यक्षांत येवन सीआरझेड वाठारांत बांदकाम केल्ल्यांक फाटबळ दिलें. ह्या वेळार आमदार लोबो हांणी मुख्यमंत्र्यां कडेन चर्चा करून तोडगो काडपाचें आस्वासन दिलें. ‘सीआरझेड ३’ हो कायदो लागू जाल्ल्यान ही समस्या आयली. ह्या गांवाक आदलो ‘सीआरझेड २’ लागू केल्यार हीं बांदकामां वाचतलीं. मुख्यमंत्र्यां सयत हांव आयज ना तर फाल्यां बसका घेतलों. हीं बांदकामां वाटावपा खातीर खंयच्या कागदपत्रांची गरज आसा, हे विशीं अधिसुचवणी जारी करात, अशी मागणी मुख्यमंत्र्यांकडेन करतले.’ अशें आमदार लोबो हांणी ह्या वेळार म्हणलां.
वेवसायिकांक फाटबळ दिवपाक हाजीर आशिल्ले ‘रिव्हॉल्युशनरी गोवन्स’ पक्षाचे फुडारी मनोज परब हांणी वेवसायिकांची अशी स्थिती जावपाक सरकाराक दोशी धरले. ह्या वेवसायिकांक वाटावपा खातीर सरकारान संरक्षण कायदो अंमलात कित्याक हाडूंक ना? असो प्रस्न परब हांणी मायकल लोबो हांकां केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
