भांगरभूंय | प्रतिनिधी
म्हापशें: हणजूण-कायसूव पंचायत ग्रामसभेंत पर्यावरण कार्यकर्ते डॉ. इनासियो फर्नांडीस हांकां मारपेट प्रकरणांतले दुबावीत आरोपी गजानन राजन तिळवे (रा. माझलवाडो हणजूण) आनी कालिस्टो जॉन फर्नाडीसस (रा. सेंट अॅन्थनी प्रायसवाडो, हणजूण) ह्या दोगांक हणजूण पुलिसांनी अटक केल्या.
हो मारपेटीचो प्रकार फाटल्या 24 नोव्हेंबर दिसा सकाळीं पंचायत सभाघरांत ग्रामसभे वेळार घडिल्लो. ह्या प्रकरणांत पुलिसांनी एकामेकां आड गुन्यांव दाखल केल्लो. डॉ. इनासियो फर्नांडीस हे ग्रामसभेंत ध्वनी प्रदुशणाच्या मुद्या वेल्यान उलयताले. ह्या वेळार दुबावीत गजानन तिळवे आनी हरांनी तांचेर हल्लो करून मारपेट केल्ली.
ह्या प्रकरणांत डॉ. फर्नांडीस हांचे कागाळीच्या आदारान हणजूण पुलिसांनी गजानन तिळले, कालिस्टो फर्नांडीस, रोहन नायक, योगेश गोवेकार आनी सॅबी डिसोझा हांचे आड गुन्यांव नोंद केल्लो.
जाल्यार गजानन तिळवे हांचे कागाळीच्या आदारान पुलिसांनी डॉ. इनासियो फर्नांडीस हांचे आड गाळी संवप आनी धमकी दिल्ल्याचो गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
