भांगरभूंय | प्रतिनिधी
मुंबय उच्च न्यायालयाच्या आदेशाची कार्यवाही
म्हापशें: हणजूण दर्यादेगे वेल्या उदरगतीच्या कामाचेर बंदी आशिल्ल्या वाठारांत परवानो नासतना बांदकाम केल्ल्या आस्थापनांचेर गटविकास अधिकारी आनी पंचायतीन कारवाय सुरू केल्या. बिरेस्तारा पांच आस्थापनांक पुलीस बंदोबस्तांत सील मारले.
फाटल्या 13 वेर मुंबय उच्च न्यायालयान आदेश जारी करून हणजूण दर्यादेगेर बेकायदो रितीन बांदकामां उबारून तातूंत सुरू केल्ल्या 175 वेवसायीक आस्थापनांचेर कारवाय करची तशेंच 10 दिसांत कृती अहवाल सादर करचो अशें निर्देशूय खंडपिठान दिल्ले.
हे विशीं रमेश मुझूमदार हांणी खंडपिठांत याचिका दाखल केल्ली. तरी लेगीत वयल्या दर्यादेगेर बेकायदो बांदकामां सुरूच आशिल्ल्याचें तांणी खंडपिठाचे नदरेक हाडून दिल्लें. हाची स्वेच्छा दखल खंडपिठान घेतिल्ली. ह्या बांदकामांक जीसीझॅडएमएन कारणां दाखय नोटीस धाडिल्ली. तरी लेगीत ह्या बांदकामांनी वेवसाय सुरू आशिल्लो. ताका लागून ह्या बांदकामांचेर कारवायेचे निर्देश खंडपिठान बार्देस गटविकास अधिकारी आनी हणजूण पंचायत सचिवांक दिल्लो.
ह्या आदेशा प्रमाण गटविकास अधिकारी आनी पंचायतीन बिरेस्तारा सावन आस्थापनांचेर कारवायचें सत्र सुरू केलां. हणजूण पंचायतीचे सचीव जितेंद्र नायक, गटविकास अधिकारी कचेरेचे विस्तार अधिकारी शिरीशकुमार तारी हांचे सयत अधिकारी पंगडान पुलीस बंदोबस्तांत पंचनामो करून पांच बांदकामांक सील मारल्यात. आयज (शुक्रारा) लेगीत ही प्रक्रिया सुरू उरतली.
ही कारवाय करतना अधिकाऱ्यांनी भेदभाव चलयला. जीं गोंया भायल्यांचीं बांदकामां वा तांचे कडल्यान वेवसाय चलता अशा बांदकामांचेर पयली कारवाय करप आनी उपरांत थळाव्यांच्या आस्थापनांचेर कारवाय करपाचो भायले भायर निर्णय गटविकास अधिकारी आनी पंचायतीन घेवन ही सील मारपाची मोहीम राबयली अशी म्हायती गोपांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
