भांगरभूंय | प्रतिनिधी
भांगरभूंय । प्रतिनिधी
म्हापशें: हालींच हणजूण्यां रिसॉर्टांत दिल्लींतल्या पर्यटकांचेर हल्लो करपाची घडणूक ताजी आसतनाच हणजूण्यां आनी शिवोले पर्यटकांचेर हल्लो करपाची आनीक एक घडणूक घडल्या. ह्या प्रकरणांत तिगांक अटक केल्या. ओव्हरटेक आनी व्हायफराचें उदक उडयिल्ल्याच्या शुल्लक कारणा वयल्यान दुबावितांनी मुंबय आनी हरियाणांतल्या पर्यटकां कडेन हें कृत्य केलें.
पुलिसांनी अटक केल्ल्यां मदीं दुबावीत विराज दिगंबर पार्सेकार (25, रा. खैराट कामुर्ली), सिध्दार्थ श्रीपाद खोर्जुंवेंकार (29, रा. वागाळी कामुर्ली) आनी कन्हैया वेर्णेंकार (रा. शिवोली) हांचो आस्पाव आसा.
कागाळदार उशा चेल्लानी (मुंबय) आनी ओंकार अंबावणे हे दोग पर्यटक आपले मोटारीन हडफडें ते हणजूणचे दिशेन वताले. तांकां झोझओ टोकयो नांवाच्या रॅस्टोरंण्टा कुशीक जीए 03 एके 5856 क्रमांकाचे मोटारसायकली वयल्या दोगां दुबावितांनी आडायलें. ओव्हरटेक करपाक दिवंक नाशिल्ल्याच्या कारणा वयल्यान कागाळदार आनी ताच्या इश्टाक जाप विचारली आनी गाळी संवून कदेल तशेंच काँक्रिटाच्या विटाच्या आदारान हल्लो केलो. ओंकार अंबावणे हाका जिवेशी मारपाच्या हेतान खर मारपेट केली. तातूंत तो गंभीर जखमी जालो. तशेंच दुबावितांनी कागाळदार तरणाटेक धक्काबुक्की केली. तशेंच मोटारीची मोडतोड करून एका लाखाचें लुकसाण केलें.
हो प्रकार मंगळारा 14 वेर रातच्या 8.40 वरांच्या सुमाराक घडिल्लो. जाल्यार पुलिसांनी बुधवारा 15 वेर फांतोडेर भांदंसंच्या 341, 308, 352, 504, 427 आनी 34 कलमा खाला गुन्यांव दाखल केला. ह्या गुन्यांवा खाला पुलिसांनी उपरांत दुबावीत आरोपी विराज पार्सेकार आनी सिद्धार्थ खोर्जुंवेंकार ह्या दोगांक अटक केली.
मजगतीं, दुसरी घडणूक बुधवारा सकाळीं 10.30 वरांच्या सुमाराक शिवोले एचडीएफसी बँके कुशीक घडली. हरियाणाची कागाळदार बायल आपले मोटारीन वताली. ह्या वेळार तिका घडणूक थळार जीए 03 एजे 5860 क्रमांकाची स्कूटर आड घालून आडायली.
मोटारीचो हारसो नितळ करतना व्हायपराचें उदक आंगार उडयिल्ल्याचो दावो करून दुबावीत दुचाकी चालकान कागाळदार बायलेक गांळी संवून तिचो लोकां मुखार हात पिळून विनयभंग केलो. हणजूण पुलिसांनी ह्या प्रकरणांत भादंसंच्या 341, 509 आनी 323 कलमा खाला गुन्यांव नोंद करून दुबावीत कन्हैया वेर्णेंकाराक अटक केली.
मजगतीं, दुबावीत आरोपी विराज पार्सेकार हाची पणजेंतल्या जिल्हो आनी सत्र न्यायालयान 20 रुपया बॉण्ड आनी तितल्याच रकमेच्या हमिदाराचे हमीचेर सशर्त जामिनार सुटका केली. तशेंच दुबावीत कन्हैया वेर्णेंकार हाची लेगीत जामिनार सुटका केल्या. फुडलो तपास हणजूण पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
