भांगरभूंय | प्रतिनिधी
सुमार 15 लाखांचें लुकसाण, दुचाकीचोय गोबर; घातपाताचो दुबाव
म्हापशें: पिकेन, पेडे-हणजूण्यां उजो लागून कपड्याच्या दुकाना सयत दुचाकी लासून गोबर जाली. हे दुर्घटणेंत सुमार 15 लाखांचें लुकसाण जालां आनी हाचे फाटल्यात घातपात आशिल्ल्याचो दुबाव दुकान धनयान उक्तायला.
ही घडणूक शुक्रारा फांतांडेर 4 वरांच्या सुमाराक घडली. घडणुकेची म्हायती मेळटकूच पिळर्ण उजो पालोवपी दळाचे जवान तशेंच हणजूण पुलिसांनी घडणूक थळार धांव घेतली. तो मेरेन दुकान पुराय जळून गोबर जाल्लें.
उपरांत दळाचे जवान रामा नायक, परेश गांवस, स्वप्नील नायक, दत्तप्रसाद सिनारी, प्रितेश महालदार आनी प्रल्हाद कोटकार ह्या पंगडान उदकाचो फवारो मारून उजो पालयलो. हणजूणचे पुलीस हवालदार राजेंद्र पाटील हांणी पंचनामो केलो.
हणजूण्यां फ्ली मार्केटा कुशीक रस्त्याचे कडेक हें गाळेवजा हंगामी स्वरुपाचें दुकान उबारिल्लें. ह्या दुकानांत विवीध प्रकारचे तयार कपडे व्हड प्रमाणांत विकूंक दवरिल्ले. दुकान धनी हनुमंत पवार हे आपल्या कुटुंबा सयत कर्नाटकांत आपल्या मूळ गांवां सोयऱ्यांच्या लग्नाक गेल्ले. उपरांत चार दिसां पयलीं तांचो पूत हो लेगीत दुकान बंद करून मूळ गांवां गेल्लो. तेन्ना सावन चार दीस दुकान बंद आशिल्लें. ह्या दुकानांत तांणी आपली डिओ स्कुटर दवरिल्ली.
उज्यांत स्कुटरी सयत सगले कपडे आनी दुकानूय जळून गोबर जालें. घडणुकेची म्हायती मेळटकूच पवार हे शुक्रारा दनपारां हणजूण्यां पावले. हे दुर्घटणेंत आपलें सुमार 15 लाखांचें लुकसाण जालां आनी घातपाताचो प्रकार आशिल्ल्याचो दावो तांणी केलो. फुडलो तपास पुलीस करतात.
उजो पालोवपी दळाक म्हायती दिवपी मनशान ही उज्याची घडणूक कळंगूट हणजूण रस्त्यार जाल्ल्याचें सांगलें. ते प्रमाण दळाच्या कंट्रोल रुमांतल्यान ही म्हायती पिळर्ण स्टेशनाक दिली. दळाचे जवान म्हायती दिवपी मनशा वरवीं गुगल मॅपाच्या आदारान घडणूक थळार पावले. तेन्ना ही घडणूक हणजूण्यां घडिल्ल्याचें स्पश्ट जालें. गुगल मॅपाच्या आदारान घडणूक थळ गांठपा खातीर दळाच्या जवानांक 20 मिणटांचो वेळ लागलो. तो मेरेन दुकान पुरायपणान जळिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
