भांगरभूंय | प्रतिनिधी
म्हापशें, प्रतिनिधीः हडफडें-नागव्यां कोमुनिदादच्या जाग्यावेल्या व्हाळार अतिक्रमण करून केल्ल्या बेकायदेशीर बांदकामांची पंचायतीन पळोवणी केली. कळंगुटे मतदारसंघ मंच हे संघटणेच्या कागाळीच्या आदारार पंचायतीन ह्या बांधकामादाराक काम बंद करपाचे आदेश दिल्ले.
बिरेस्तारा २ तारखेक सकाळीं पंचायत सचीव रघुवीर बागकार आनी कर्मचार्यांनी ह्या सर्व्हे क्रमांक १३५/ २४ तल्या बेकायदो बांदकामाची पळोवणी केली आनी सर्व्हे केलो. ह्या वेळार मुखेल व्हाळाचेर अतिक्रमण करून बांदकाम केल्ल्याचें दिसून आयलें. कळंगुटे मतदारसंघ मंचाचे (सीसीएफ) अध्यक्ष प्रेमानंद दिवकार आनी पदाधिकार्यांनी ह्या बेकायदो बांदकामा आड तशेंच संबंदी सरकारी प्राधिकरणां कडेन कागाळ करून कारवायेची मागणी केल्ली. हे कागाळीच्या आदारार हडफडें-नागव्यांचे प्रभारी सरपंच सुषमा नागवेंकार हांणी हें बेकायदो बांदकाम करपी केपीडी डेव्हलोपर्स हे बांदकाम कंपनीक नोटीस जारी केल्ली.
पंचायत वा संबंदीत प्राधिकरणां कडल्यान गरजेची मंजुरी वा ना हरकत दाखलो घेनासतना व्हाळाचेर कॉंक्रिट स्लॅबाचें बेकायदेशीर बांदकाम केल्ल्यान हें काम बेगीन बंद करचें अशे निर्देशूय वयले कंपनीच्या धनयाक दिल्यात. तशेंच पळोवणी करपाची वेळ पंचायतीन निश्चीत केल्ली. ते प्रमाण पंचायतीन ही पळोवणी केल्या.
मंचान पंचायती सयत उदकास्रोत खात्या कडेन कागाळ दाखल केल्ली. हडफडें गांवांतल्या वयल्या सर्व्हे क्रमांकाच्या जाग्यार आशिल्लो व्हाळ कॉंक्रिटाचो स्लॅब घालून तो धापला असो दावो मंचान केल्लो.
पंचायत घरा लागसारा हो बेकायदेशीर बांधकामाचो प्रकार जाल्ल्यान रयवासी आनी पर्यारणवादी लोकांनी चिंता उक्तायल्ली. पंचायत मंडळ आनी संबंदीत खात्या कडल्यान कायदे आनी नेम आनी सैमा कडेन आडनदर केल्ले खातीर मंचान राग उक्तावन गरजेची कारवाय करपाची मागणी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
