भांगरभूंय | प्रतिनिधी
कनिश्ठ कोरिओग्राफराचें लिंगीक शोशण केल्ल्याचो आरोप
म्हापशें: कनिश्ठ कोरिओग्राफराचें लिंगीक शोशण केल्ल्या प्रकरणांत तेलगू सिनेसृश्टींतलो नामनेचो कोेरिओग्राफर शेख जानी बाशा उर्फ जानी मास्टर हाका गोंयांत हडफड्यां अटक केली. काल (बिरेस्तारा) हणजूण पुलिसांच्या पालवान हैदराबाद पुलिसांनी ही कारवाय केली.
दुबाविता बारोबर काम करपी पिडीत ज्युनियर कोरिओग्राफरान लिंगीक अत्याचाराचो आरोप करून रायदुर्गम पुलीस स्टेशनार फाटल्या 11 सप्टेंबर दिसा कागाळ नोंद केल्ली. उपरांत 15 सप्टेंबर दिसा दुबावीत जानी मास्टरा आड शुन्य कलमा खाला गुन्यांव नोंद करून हें प्रकरण नरसिंगी पुलीस स्टेशनार वर्ग केल्लें. ते प्रमाण 16 सप्टेंबर दिसा दुबाविता आड पुलिसांनी भारतीय न्याय संहिता, बाल कायदो आनी पोक्सो खाला बलात्काराच्या आरोपा खाला गुन्यांव नोंद केल्लो.
गुन्यांव नोंद जाले उपरांत दुबावीत जानी मास्टर हाणें हैदराबाद सावन धांव मारिल्ली. दुबाविताक धरपा खातीर आनी ताचें मोबायल लोकेशन तपासपा खातीर पुलिसांनी खास पंगड तयार केल्ले.
बुधवारा रातीं दुबावीत गोंयांतल्या दर्यादेग वाठारांतल्या हडफड्यां राबित्याक आशिल्ल्याची म्हायती सायबराबाद पुलिसांच्या हाताक लागली. उपरांत ही म्हायती हणजूण पुलिसांक दिली. बिरेस्तारा फांतोडेर हडफडें वाठारांत भोंवता आसतना दुबाविताक हणजूण पुलीस निरिक्षक सूरज गांवस हांच्या फुडारपणा खालच्या पंगडान दुबाविताक धरून ताब्यांत घेतलो आनी अटक केली. उपरांत हैदराबाद पुलिसांनी दुबाविताक ताब्यांत घेतलो, आनी म्हापशें न्यायालया कडल्यान ट्रांझीट रिमांड घेवन दुबाविताक घेवन पुलीस हैदराबाद गेले.
मजगतीं, पिडीत 16 वर्सां पिरायेचें आसतना एका टीव्ही शोंत दिसले उपरांत दुबावीत जानीच्या पंगडा कडल्यान कामाची ऑफर दिल्ली. उपरांत तिचे कडेन नोकरी जाय आसल्यार लिंगीक अनुकुलतायेची मागणी केल्ली. मुंबयंतल्या एका हॉटेलाचे कुडींत दुबावितान तिचेर पयली बळजबरी केल्ली. ही घडणूक कोणाकूय सांगल्यार वा कागाळ केल्यार काम मेळचें ना अशी धमकी तिका दुबावितान दिल्ली.
उपरांत जेन्ना जेन्ना संद मेळटा तेन्ना दुबावीत तिचेर लिंगीक अत्याचार करीत आशिल्लो. जेन्ना पिडितेन दुबाविताक टाळपाचो यत्न केलो तेन्ना तेलगू सिनेसृश्टींत तिका मेळपी कामाच्यो ऑफरी बंद जाल्यो. तशेंच फाटल्या 17 आनी 28 ऑगस्टाक तिका निनावी फोना वरवीं सादूर रावपाची धमकी दिल्ली. उपरांत तिणें पुलिशेंत धांव घेवपाचो निर्णय घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
