भांगरभूंय | प्रतिनिधी
इतलो पयसो खर्च करून लेगीत सुविधांचो उणाव
पणजी: पणजी शार अजून स्मार्ट जावंक नासलें तरी फाटल्या स वर्सांत ह्या कामां खातीर सुमार 467 कोटी 9 लाख खर्च केल्यात. फाटल्या स वर्सांत इतलो पयसो खर्च करून लेगीत शारांत अजून खंयच्योच सुविधा लोकां खातीर तयार केल्ल्यो नात.
स्मार्ट सिटीच्या कामां खातीर आतां मेरेन केंद्र आनी राज्य सरकारा कडल्यान 516 कोटी 30 लाख रुपया दिल्यात. हातूंतले 467 कोटी 9 लाख 58 हजार 714 रुपया आतां मेरेन विवीध कामां खातीर खर्च केल्यात. ह्या विशयाचेर विरोधी पक्ष फुडारी युरी आलेमांव हांणी अधिवेशनांत लेखी प्रस्न मांडिल्लो. शार उदरगत मंत्री विश्वजीत राणे हांणी वयली म्हायती लेखी स्वरुपांत दिली.
स्मार्ट सिटी खातीर केंद्र सरकार आनी गोंय सरकार हांचे मेळून 930 कोटी रुपया मंजूर जाल्यात आनी हातूंतले 465 कोटी केंद्र सरकार आनी 465 कोटी राज्य सरकाराचे आसात. 2017-2018 ते 2022-2023 ह्या स वर्सांत आतां मेरेन 516 कोटी 30 लाख रुपया दिल्यात. जाल्यार हातूंतले 467 कोटी 9 लाख 58 हजार 714 रुपया स्मार्ट सिटीच्या कामा खातीर खर्च केल्यात अशी म्हायती लेखी जापेंतल्यान उपलब्ध जाल्या.
सद्या पणजेंत स्मार्ट सिटीचीं कामां नेटान सुरू आसात आनी रोखडींच सोंपोवपा खातीर काम झुजा पांवड्यार सुरू आसा. फाटलीं स वर्सां स्मार्ट सिटीचें काम सुरू जाल्लें आसलें तरी सुरवातेक कांसवा गतीन कामां केलीं. सद्या पणजेंतले सगले रस्ते खणून फुटपाथ बांदतात. तशेंच नव्यो पायपलायनी तशेंच हेर ल्हान प्रकल्पाचीं कामां सुरू आसात.
फाटल्या स वर्सांत स्मार्ट सिटीच्या नांवा खाला खूबशे ल्हान प्रकल्प बांदले तरी ते निरुपेगी थारले. पाटो पणजे स्मार्ट सिटी खाला कोट्यांनी रुपया खर्च करून खारफुटी उद्यान बांदलें. सद्या तें धुल्ल खायत पडलां. तेच प्रमाण शारांत जाग्याजाग्यांनी सोबितीकरणा खातीर कांय पुतळे उबारिल्ले ते लेगीत निरुपेगी थारले. अशा कामांचेर कोट्यांनी रुपया खर्च केल्यात. स्मार्ट सिटीच्या वट्ट 920 कोटी मदली अर्दी रक्कम खर्च केल्ली आसली तरी शारांत अजून लेगीत उदरगतीचीं कामां दिसून येनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
