भांगरभूंय | प्रतिनिधी
भेंडो, चिटकी, तवश्यान खाल्लो भावः फलोत्पादन म्हामंडळाची म्हायती
पणजीः गोंय राज्य फलोत्पादन म्हामंडळान फाटल्या स म्हयन्यांत गोंयच्या शेतकारांची 527 टन इतली भाजी खपयल्या. भेंडें, चिटकी आनी तवशीं हांची मागणी हेर भाजयां परस सगल्यांत चड आसा. भेंडें 232 टन जाल्यार चिटकी 68 टन आनी तवशीं 58 टन लोकांनी फलोत्पादन म्हामंडळा कडल्यान विकती घेतल्या, अशी म्हायती फलोत्पादन म्हामंडळाचे वेवस्थापकी संचालक चंद्रहास फळदेसाय हांणी दिली.
फलोत्पादन म्हामंडळान एप्रील ते ऑगस्ट मेरेन गोंयच्या शेतकारां कडल्यान 7 लाख कील इतली गांवठी भाजी रु. 3.20 कोटी इतले किमतींत विकती घेतिल्ली अशी बातमी ‘भांगरभूंय’न उजवाडाक हाडिल्ली. ह्या 7 लाख किलां मदली 5 लाख कील भाजी फलोत्पादन म्हामंडळान एप्रील ते संप्टेबर मजगतीं विकल्या. फलोत्पादन म्हामंडळा कडेन 1,300 विक्रेते नोंद आसात. ह्या विक्रेत्यांनी 4,88,917 कील इतली भाजी विकल्या, म्हामंडळाची चार विक्री केंद्रां आसात. ह्या केंद्रांचेर 19,747 कील आनी हेर खाजगी विक्रेत्यांनी 18,707 कील इतली भाजी खपयल्या.
फक्त नोंद आशिल्ल्या विक्रेत्यांनी एप्रील म्हयन्यात 1.96 लाख कील, मे म्हयन्यात 1.52 लाख कील, जून म्हयन्यांत 69,358 कील, जुलय म्हयन्यांत 27,836 कील, ऑगस्ट म्हयन्यांत 40,989 कील इतली भाजी खपयल्या.
हातूंत सगल्यांत चड भेंडे 2.32 लाख कील, चिटकी 68,788 कील, तवशीं 58,040 कील, हरवी मिरसांग 57,350 कील आनी कोंकण दुदी 32,200 कील इतली लोकांनी विकती घेतल्या.
जाल्यार वायंगी 13,816 कील, लिंबू 7,117 कील, तेंडली 6,322 कील, कोबी 5,036 कील, तांबडो दुदी 2,748 कील आनी घोंसाळीं 1,910 कील इतली खपल्यात.
जाल्यार खूब उण्यो आशिल्ल्यो भाजयो जश्यो की मको 140 कील, भाजयेची केळी 65 कील, सुरण 30 कील, लांब मिरसांग 14 कील, ढब्बू मिरसांग 10 कील, बटाट आनी गाजर दरेकी 5 कील खपल्यात.
ह्या म्हयन्यांत खपली 2 टन भाजी
सप्टेंबर म्हयनो ते आतां मेरेन 2 टन म्हळ्यार 2,282 लाख कील भाजी फलोत्पादन म्हामंडळान आपल्या विक्रेत्या वरवीं खपयल्या. तातूंत भेंडें 747 कील, तवशीं 1,160 कील, कोंकण दुदी 180 कील, लिंबू 95 कील, घोंसाळीं 91 कील
आनी कारातीं 9 कील खपयल्यात.
पावसांत लोकांनी घेतली 138 टन भाजी विकती
जून ते ऑगस्ट म्हयन्या मेरेन जेन्ना पावसाचो सांवार आशिल्लो तेन्ना फलोत्पादन म्हामंडळाच्या विक्रेत्यांनी 1.38 लाख कील इतली भाजी खपयल्या. हातूंत भेंडें 70,355 कील, चिटकी 7,058 कील, हरवी मिरसांग 4,041 कील, कारातीं 136 कील, कोंकण दुदी 8,609 कील, वांयगी 814 कील, ढब्बू 5 कील, तवशीं 37,787 कील, लिंबू 6,552 कील, वाल 634 कील, तांबडो दुदी 278 कील, घोंसाळीं 1,757 कील, भाजयेची केळी 46 कील, सुरण 15 कील आनी तेंडली 96 कील इतली लोकांनी विकती घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
