भांगरभूंय | प्रतिनिधी
पणजी : स. मनोहर पर्रीकार हांणी मुख्यमंत्री म्हणून गोंयचे उदरगती खातीर व्हड योगदान दिलां. भाजपच्या सुशासनाक बारा वर्सां पुराय जाल्यांत. हाचे मजगतीं पर्रीकार हांणी संरक्षण मंत्री म्हणून संरक्षण क्षेत्राक घटमूट करपा खातीर काम केलें. तांचें काम आमचे सयत देशांतल्या सगल्या नागरिकांक प्रेरणा दीत रावतलें अशें प्रतिपादन रेल्वे राज्यमंत्री व्ही सोमण्णा हांणी उक्तायलें. बिरेस्तारा तांणी मिरामार पर्रीकार हांच्या स्मृतिस्थळाचें दर्शन घेतलें. ह्या वेळार भाजपाचे हेर पदाधिकारी हाजीर आशिल्ले.
प्रधानमंत्री नरेंद्र मोदींच्या बारा वर्सांच्या काळांत देशांत बरीच उदरगत जाल्या. यूपीए काळांत वा त्यान पयलीं पन्नास वर्सां देशांत जीं कामां जावंक नात, तीं मोदींच्या कार्यकाळांत जाल्यांत. विकसीत भारताचें सपन पुराय करपा खातीर राज्य, जिल्ले विकसीत जावपाक जाय. हेखातीर समन्वयान काम करप गरजेचें.
भाजप सरकार दरेका राज्यांत उदरगतीचीं कामां करता. बरें प्रशासन कशें आसता हें मोदींनी दाखोवन दिलें. गोंय संवसारीक दर्जाचें पर्यटन स्थळ. हांगा पर्यटन तशेंच हेर मळांचेर उदरगतीचीं कामां करपा खातीर मुख्यमंत्री डॉ. प्रमोद सावंत तशेंच प्रधानमंत्री नरेंद्र मोदी यत्न करतात. मोदींच्या दूरदर्शीपणाक लागून आनी डबल इंजिन सरकाराक लागून उदरगतीची गती वाडल्या. गोंय हाचें उत्कृश्ठ उदाहरण. भाजप काळांतूच कोट्यांनी लोक दारिद्र्या पसून भायर पडल्यात. मनोहर पर्रीकर हांचे आशीर्वाद तशेंच मोदींच्या कर्तृत्वाक लागून आमच्या देशाचो फुडार पर्जळीत आसा अशें व्ही सोमण्णा हांणी सांगलें.
केंद्र सरकार दरेका राज्याचें हित जपतले
व्ही सोमण्णा हांणी, दरेका राज्याक आपलें हित पळोवपाचो अधिकार आसा. खंयचेंय राज्य आपले जनते खातीर योग्य आशिल्लें काम करता. म्हादयविशीं चर्चा सुरू आसा. हातुंतल्यो तांत्रीक गजाली म्हाका खबर नात. केंद्र सरकार सगल्या राज्यांचें हीत जपतली हाची म्हाका खात्री आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
