भांगरभूंय | प्रतिनिधी
गोंय क्रिकेट संघटणेच्या पांच जाणांची राष्ट्रीय क्रिकेट अकादमींत (एनसीए) वेगळ्यावेगळ्या पदां खातीर नेमणूक जाल्या. स्वप्नील अस्नोडकार, शदाब जकाती, निनाद पावस्कार, सलमा दिवकर आनी विवेककुमार मिश्रा हांची एनसीए हातूंत निवड जाल्या.
सालेम हांगाच्या 19 वर्सां पिरासे सकयले क्रिकेट खेळगड्यांच्या शिबिरांत निनाद पावस्काराची स्त्रेंथ अॅण्ड कंडिशनींग प्रशिक्षक म्हणून निवड केल्या. निनाद पावस्कारान गोंय रणजी पंगडांत स्त्रेंथ अॅण्ड कंडिशनींग प्रशिक्षक म्हणून काम केलां.
गोंयचो आदलो आयपीएल खेळगडो आनी 23 वर्सां पिराये सकयलो राज्य क्रिकेट पंगडाचो प्रशिक्षक स्वप्नील अस्नोडकाराची राजकोटांत 19 वर्सां पिराये सकयल्या क्रिकेट शिबिरांत बॅटींग प्रशिक्षक म्हणून निवड केल्या.
नागपूरांत 19 वर्सां पिराये सकयले चलयांच्या प्रशिक्षण शिबिरांत गोंयची सलमा दिवकाराची स्त्रेंथ अॅण्ड कंडिशनींग प्रशिक्षक, जाल्यार आयपीएल खेळगडो आनी गोंयच्या पंगडाचो बॉलर शदाब जकाती मुंबयच्या 16 वर्सां पिराये सकयले राष्ट्रीय क्रिकेट अकादमीच्या शिबिरांत बॉलींग प्रशिक्षक आसलो. हाचे खेरीत सुरत शारांत जावपी 16 वर्सां पिराये सकयले क्रिकेटरांच्या शिबिरा खातीर विवेककुमार मिश्राची फिझियोथॅरापिस्ट म्हणून नेमणूक केल्या. निवड जाल्ल्या सगल्यांक गोंय क्रिकेट संघटणेचे अध्यक्ष विपुल फडकेन परबीं भेटयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
