स्वताच्या खर्चान सरपंच प्रशांत नायक हांणी उबारलें शाळेचें पाखें
भांगरभूंय | प्रतिनिधी
कोरगांव, प्रतिनिधी ः मांद्रेंतल्या देऊळवाडो सरकारी मुळावे शाळेचें पाखें (छप्पर) कोसळिल्ल्यान पालक आनी शिक्षकांच्या मनांत भंय निर्माण जाल्लो. मांद्रे सरपंच प्रशांत उर्फ बाळा नायक हांकां हे विशीं सांगलें तेन्ना तांणी स्वताच्या खर्चान तें बांदून दितलों अशें उतर दिल्लें. तांणी आपलें उतर पाळून सुमार 3 लाख रुपया खर्च करून तें बांदून दिलें. हे खातीर शाळा वेवस्थापनान तांचो भोवमान केलो.
हे विशीं सरपंच नायक हांणी सांगलें, शाळा उदरगत नियोजन समितीचे बसकेंत म्हाका आपयल्लो तेन्ना पाखें कोसळपाचे वाटेर आसा असो भंय उक्तायिल्लो. आनी स्वता हांवें पळयलें तेन्ना खंयच्याय वेळार तें कोसळूंक शकता अशी परिस्थिती आशिल्ली. त्या वेळार हांवें ही जापसालदारकी घेवन स्वताच्या खर्चान शिक्षक आनी विद्यार्थ्यांची सुरक्षीतताय निश्चित केली.
देऊळवाड्याचे पंच वांगडी राजेश मांद्रेकार हांणी पाखें बांदपाक पालव दिलो अशीय म्हायती नायक हांणी दिली. तांणी म्हणलें, मांद्रेकार आनी हांवें आमच्याच खर्चान तें उबारले. मुळाव्या शाळांक दिवपी अनुदान वाडोवपाची गरज आसा. तांकां दिल्ल्या अनुदानांत शाळा वेवस्थापन करप शक्य ना. आदले मुख्यमंत्री बांदोडकार हांणी स्थापन केल्ल्या सरकारी शाळांची सुरक्षीतताय राखप गरजेचें अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
