भांगरभूंय | प्रतिनिधी
येजमान ऑस्ट्रेलिया पंगडान वॅस्ट इंडिजा आड चालू आशिल्ले पयले टॅस्टीचेर आपले पकड घट्ट केली. ताणें दुसऱ्या दिसा आपलो पयलो डाव 4 बाद 598चेर घोशीत केलो. दुसऱ्या दिसाचो खेळ सोंपलो त्या वेळार वॅस्ट इंडिजान बिनबाद 74 धांवड्यो केल्यात.
ते पयलीं स्टीव स्मिथ आनी मार्कस लाबशेन हांणी दोट्टी शेंकड्याची खेळी केली. स्मिथान आदलो म्हान बॅट्समन डॉन ब्रॅडमनांच्या 29 शेंकड्यांची बरोबरी केली. ताणें नाबाद 200 धांवड्यांची खेळी केली. ऑस्ट्रेलिये वतीन रिकी पॉण्टिंग (41), स्टीव वॉ (32) आनी मॅथ्यू हेडन (30) हांणी स्मिथा परस चड शेंकडे मारल्यात. संवसारीक विक्रमाचो विचार केलो जाल्यार सगल्यांत चड टॅस्ट शेंकडे मारपाचो विक्रम सचिन तेंडुलकराच्या नांवार आसा. ताणें 51 शेंकडे मारल्यात.
मजगतीं, दुसऱ्या दिसा उस्मान ख्वाजा बाद जाल्या उपरांत स्मिथ बॅटींगेक आयलो. ताणें लाबशेन वांगडा मेळून पंगडाचो स्कोर 200, 300 आनी 400चेर पावयलो. लाबशेनान लेगीत दोट्टी शेंकडो पुर्ण केलो. ताणें 204 धांवड्यांची खेळी केली. ताका ब्रेथवेटान तंबूत धाडलो. ते उपरांत ट्रॅवीस हेड मैदानांत देंवलो. ताणें वन डे भशेन बॅटींग केली. पूण, ताका एके धांवडेन शेंकडो चुकलो. ताणें 95 बॉलांनी 11 चवक्यांचे मजतीन 99 धांवड्यो केल्यो.
तो बाद जायना फुडें ऑस्ट्रेलियेन डाव घोशीत केलो. विंडिजा वतीन क्रॅग ब्रेथवेटान सगल्यांत चड 2 विकेटी घेतल्यो. जाल्यार जेडन आनी मेयर्स हाणें दरेकी एक विकेटी मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
