भांगरभूंय | प्रतिनिधी
– कामांचो घेतलो नियाळ, लोकांच्यो समस्याय आयकल्यो
पणजीः न्यायालयांत लोकांच्यो कागाळी अायकून घेवपी उच्च न्यायालयाच्या न्यायाधिशांनी आयज स्वता स्मार्ट सीटीच्या कामांची प्रत्यक्षांत पळोवणी केली. उच्च न्यायालयाचे न्यायाधीश महेश सोनक आनी वाल्मिकी मिनेझीस हांणी स्मार्ट सीटीच्या कामांची प्रत्यक्षांत पळोवणी करून नियाळ घेतलो. तशेंच ह्या वेळार पणजेकारांनी आपल्यो कागाळी तांचे मुखार मांडल्यो. ह्या वेळार स्मार्ट सीटीचे एमडी संजीत रॉड्रिग्स हजर आशिल्ले.
स्मार्ट सीटीच्या कामां आड जायत्यो जाचिका उच्च न्यायालयांत दाखल जाल्ल्यो. स्मार्ट सीटीच्या कामांक लागून धुल्ल प्रदुशण जायत आशिल्ल्यान ताचो परिणाम पणजेकारांच्या भलायकेचेर जाता. तशेंच रस्ते खणून दवरिल्ल्यान लोकांच्या वेवसायाचेर परिणाम जाला, अशी कागाळ याचिकेंत केल्ली. पळोवणी वेळार गोंयचे अॅडव्होकेट जनरल देविदास पांगम, याचिकादार पियुश पंचाल, वेवसायीक मनोज काकुलो, याचिकादारांचे आदोगाद, थळावे हजर आशिल्ले.
सुमार सांजे पांच वरांचेर पळोवणेक सुरवात जाली. न्यायाधिशांनी ताज विवांता जंक्शन ते शितल जंक्शन मेरेनच्या काँक्रीट रस्त्याच्या कामाची पळोवणी केली. उपरांत शितल जंक्शन ते काकुलो मॉल मेरेन जावपी सिवरेजीच्या कामांचीय पळोवणी केली. उपरांत कांपाल वचपी नव्यान बांदिल्ल्या रस्त्याचीय न्यायाधिशांनी पळोवणी केली. त्या वेळार ताका तेंकून आशिल्ल्या घाणयाऱ्या उदकान भरिल्लो सांतइनेजीचो नालो तांचे नदरे मुखार आयलो.
सुरवातीक स्मार्ट सीटीचे एमडी संजीत रॉड्रिग्स हांणी स्मार्ट सीटीचीं कामां खंय मेरेन पावल्यात, कशें पद्दतीन ती चालू आसात, गटारां बांदपाचें नियोजन कशें आसता, तशेंच केबल घालपा खातीर रस्त्या कुशीक कशी वेवस्था चल्ल्या, सिवरेजीचें काम कशें तरेन चलता हे विशीं प्रत्यक्षांत पळोवणी केली. रस्त्या कुशीच्या फुटपाथांचें काम कशें चलता हाचीय म्हायती तांणी न्यायाधिशांक दिली.
कामांची पळोवणी चालू आसतना पणजेकारांनी आपलीं गाराणी न्यायमूर्ती मुखार मांडली आनी स्मार्ट सीटीच्या कामां विशीं तिडक उक्तायली. स्मार्ट सीटीचीं कामां नियोजन करितनासतना चल्ल्यात. तांचेर देखरेख कसलीच ना, ताका लागून पणजेकारांचे हाल जाल्यात. महालक्ष्मी देवळा कडेन स्मार्ट सीटीची कामां घाळपणान चल्ल्यात. न्यायाधीश येवचे दोन दीस पयलीं कामां चालू आसतना धुल्ल प्रदुशण जावचे न्हय, हे खातीर थंय उदक मारपाक सुरवात केल्या. तशेंच नव्या बांदिल्ल्या काँक्रिटाच्या रस्त्यांचेरूय धुल्ल पळोवपाक मेळटा, अशो कागाळी पणजेकारांनी आनी याचिकादार पियुश पंचाल हांणी मांडली.
न्यायमूर्तींनी स्मार्ट सीटी एमडी हांणी दिल्ली म्हायती आनी लोकांची गाराणी आयकून घेतली. तशेंच ह्या कामांक लागून वेवसाय कसो चल्ला, असोय प्रस्न न्यायमूर्तींनी थळावे वेवसायिकांक विचारलो. फाल्यां हे विशींची सुनावणी उच्च न्यायालयांत येवपाची शक्यताय आसा. सुनावणे वेळार न्यायाधीश आपले निश्कर्श मांडपाक शकतात.
न्यायाधीश स्मार्ट सीटीचीं पळोवणी करचे पयलीं स्मार्ट सीटीचे एमडी संजीत रॉड्रिग्स हांणी सांत इनेज भौशीक बांदकाम कार्यालया मुखार चलिल्ल्या कामांची पळोवणी केल्ली. स्मार्ट सीटीचें काम 31 मे मेरेन पुराय जातले. हो विशय न्यायालयांत आसा. देखून हाचेर चड उलोवपाक मेळना, अशें तांणी सांगलें.
स्मार्ट सीटीच्या कामांच्या पळोवणे वेळार भयंकर स्थिती मुखार आयली. रस्ते खंयचे दिकेन वतात हाचो नेम ना. नव्यान बांदिल्ल्या रस्त्याचेरूय धुल्ल जाल्या आनी लोकांची भलायकी संकश्टांत आयल्या. न्यायालयांत न्यायाधिशा मुखार मांडिल्लीं फटीची म्हायती आयज उक्ताडार आयल्या. दिल्ले तारखे भितर कामां जावंक ना जाल्यार आमी अधिकाऱ्यांक ख्यास्त करपाची मागणी करतले. आमकां न्यायमूर्तींचेर पुराय विस्वास आसा.
-मनोज काकुलो, वेवसायीक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
