भांगरभूंय | प्रतिनिधी
म्हापशें, प्रतिनिधी ः पर्वरेतल्या मॅग्नीफिक हॉटेलाच्या एका कुडींतल्यान तमिळनाडूच्या पर्यटकांच्यो 3 लाखांच्यो भांगराच्यो वस्ती चोरयेक गेल्यो. ह्या प्रकरणांत पुलिसांनी अज्ञात चोरांचेर गुन्यांव नोंद केला.
ही चोरी बुधवारा 15 मे मध्यान रातीं 12 ते सकाळीं 5.30 वरां मजगतीं जाली. पर्वरे पुलिसांनी शुक्रारा 17 तारखेक अज्ञात व्यक्तीं आड गुन्यांव नोंद केला.
कागाळदार गोपालाप्पा गंगूर (तमिळनाडू) हो पर्यटक आपल्या कुटुंबासयत गोंय भोंवडेर आयिल्लो. पीडीए कॉलनी पर्वरींतल्या मॅग्नीफिक हॉटेलांत ते रावले. वयल्या घडणुकेच्या वेळार ते सगळें कुडींत न्हिदिल्ले आसतना चोरांनी कुडीचें दार उगडून ही चोरी केली. हातूंत दोन कर्णफुलां आनी एक हार मेळून तीन लाखांच्यो भांगराच्यो वस्ती चोरांनी फारायल्यो. ह्या प्रकरणांत पुलीस उपनिरीक्षक सीताराम मळीक फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
