भांगरभूंय | प्रतिनिधी
मडगांव, प्रतिनिधी ः कदंब बस स्टँडा कडल्यान एसजीपीडीए घावूक नुस्त्याच्या बाजारा वटेन वचपी टेम्पो चालकाचो गाडये वयलो ताबो गेलो आनी गाडयेन पार्क केल्ल्या दुसऱ्या गाडयेक धपको दिलो. हांतूत गाडयेंतल्या कुयरो वेळीप (55, मोरपिर्ला, फातर्पा) हाका मरण आयलें जाल्यार पिकअप ड्रायव्हर दीपक गांवकार गंभीर जखमी जालो.
मेळिल्ले म्हायती प्रमाण, कदंब बस स्टेशन रस्त्या वयल्यान एसजीपीडीए घावूक नुस्त्याच्या बाजारा वटेन वचपी वेवसायीक टेम्पो चालकाचो गाडये वयलो ताबो गेलो आनी तो टेम्पोन रस्त्या कुशीक पार्क आशिल्ल्या तीन गाडयांक धपको दिलो. हो अपघात शेनवारा फातोडेर सुमार 3.15 वरांचेर जालो. हांतूत टेम्पोचो ड्रायव्हर आनी अजून एक मनीस गंभीर जखमी जालो. गाडयेची दारां बंद जाल्ल्यान दोग जाण गाडयेंत आडखून उरले. उपरांत मडगांव उजो पालोवपी दळाच्या जवानांनी आनी नागरिकांनी गाडयेचें दार फोडून तांका भायर काडले. उपरांत एम्ब्युलन्स आपयली जखमींची तपासणी केली तेन्ना तांतूतल्या कुयरो वेळीप हाका मरण आयिल्ल्याचे सांगले. जखमी ड्रायव्हर दीपक गांवकार हाका दक्षिण गोंय जिल्हो हॉस्पिटलांत उपचारा खातीर दाखल केला. पुलीस पुलीस निरिक्षक नाथन आल्मेदा हांच्या मार्गदर्शना खाला पुलीस हवालदार कृष्णा नायक हांणी पंचनामो केलो. पुलीस उपनिरिक्षक अमीन नायक ह्या प्रकरणाची फुडली चवकशी करतात. ह्या अपघातात फतोर्डा पुलिसांनी पिकअप चालक दीपक गांवकार हांचे आड गुन्यांव नोंद केला.
पार्क केल्ल्या वाहनांचो प्रस्न कायम!
राधाकृष्ण हॉटेला सावन फोल्गा रेस्टॉरंट मेरेन एसजीपीडीए घावूक नुस्त्याच्या बाजारपेठे लागसार गाडयो पार्क केल्ल्यो आसतात. हाका लागून ह्या रस्त्यार येरादारी कोंयडी जाता आनी अपघात जातात. ह्या रस्त्यार गाडयो पार्क करपाक परवानगी दिवची न्हय अशी विनंती थळाव्या लोकांनी मडगांव नगरपालिका आनी फातोड्यां पुलिसांक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
