भांगरभूंय | प्रतिनिधी
म्हापशें, प्रतिनिधी ः कोलवाळे बंदखणींतल्या ब्लॉक 2 ची गेट आडावन तशेंच जेल अधीक्षक आनी कर्मचाऱ्यांक धमकावन तांच्या कामात आडखळ निर्माण करपी कैदी विकट भगत हाचे आड कोलवाळ पुलिसांनी गुन्यांव नोंद केला.
ही घडणूक शुक्रारा सांजवेळा 4.45 च्या सुमाराक घडली. हे संबंदी जेल अधीक्षक शंकर गांवकार हांणी पुलिशेंत कागाळ दाखल केल्या. जेल प्रशासनान कैदी भगत हाची बंदखणींतल्या अंडरट्रायल कैद्यांच्या विभाग 2 मदल्यान विभाग 4 त बदली करपाचो आदेश जारी केल्लो. ह्या आदेशाची कारवाय करपाक कागाळदार अधीक्षक गांवकर आनी कर्मचारी गेल्ले. ह्या वेळार कैदी भगतान हेर कैद्यांक आपोवन विभागांतल्या भायर सरपाची गेट आडायली. आनी कागाळदारांक धमकी दिली.
कागाळदारांक आनी हेर जेल कर्मचाऱ्यांक तांचे कामा मदीं आडखळ निर्माण केल्ल्यान आनी धमकावपा खातीर दुबावीत भगत हांचे आड कोलवाळ पुलिसांनी भा.दं.सं.च्या कलम 186 आनी 506 (2) खाला गुन्यांव नोंद केला. पुलीस निरिक्षक विजय राणे हांच्या मार्गदर्शना खाला हवालदार अनिल पिळगांवकार फुडलो तपास करतात.
मजगतीं, कैदी विकट भगताचेर मार्च 2017 वर्सा देवबाग, काणकोणा निर्जन सुवातेर व्हरुन डॅनिली मॅकलॉघलिन ह्या 28 वर्सां पिरायेच्या आयरीश तरणाटेचेर बलात्कार आनी खून केल्ल्याचो गुन्यांव नोंद आसा. ह्या प्रकरणांत ताका अंडरट्रायल कैदी म्हणून बंदखणींत दवरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
