भांगरभूंय | प्रतिनिधी
पणजी, बातमीदार ः स्मार्ट सिटी पणजेंत आयज सकाळीं 10 ते दनपारां 12 ह्या दोन वरां भितर 3.3 इंच अवकाळी पावसाची नोंद जाली. ह्या पावसांत स्मार्ट सिटी परतून बुडली. शारांतले भोवतेक रस्ते उदकान भरिल्ल्यान नागरिकां त्रास जाले. 18 जून रस्त्या वयल्या दुकानांनी उदक भितर सरलें. जाल्यार वेगवेगळ्या वाठारांनी झाडां आनी वीज खांबे पडून लुकसाण जालें.
मळबांत सकाळ सावन काळीं कुपां एकठांय जावंक लागिल्लीं. सकाळीं साडेसात वरांचेर पावस झडलो. मागीर 10 वरांचेर वारो आनी गडगड्या सयत नेटाच्या पावसाक सुरवात जाली. दनपरां पावणे बारांक सुमार पावस मात्सो उणो जालो. ह्या पावसांत दयानंद बांदोडकार रस्तो, मिरामार वाठार, 18 जून रस्तो, भाटले, टोंका वाठार, कदंब बस स्टँड वाठार उदकान भरलें. स्मार्ट सिटीची कामां चालू आशिल्लो वाठार चिखलान भरलो. कांय काळा सावन प्रशासनान ‘बॉम्बे बाजार’ वाठारांतलो रस्तोय बंद केल्लो. पावसाक लागून जायत्या रस्त्यांचेर येरादारी आडकून उरली.
महापौर रोहित मोन्सेरात हांणी सकाळीं पणजीत चालू आशिल्ल्या कामांची पळोवणी केली. शारांत उदक भरलें उपरांत पालिका म्हामंडळाचे कामगार रोखडेच रस्त्यार आयलें. पूण स्मार्ट सिटीचे अधिकारी खंयच दिसूंक नाशिल्ले. आमी पयलींच ड्रेनेज निवळ केल्ले. पूण स्मार्ट सिटीच्या कामांची धुल्ल आनी माती परतून ड्रेनेजांत एकठांय जाली आनी ताका लागून उदक भरलें. तांणी रस्ते बांदले पूण ड्रेनेजाचे काम अजून करुंक ना. सोमारा हे संबंदी बसका घेवपाची विनवणी आमी मुखेल सचीवा कडेन केल्या. स्मार्ट सिटीन ड्रेनेजाचे काम बेगीनांत बेगीन पुराय करपाचे गरज आसा अशें तांणी ह्या वेळार सांगलें.
मजगतीं, पणजीतांत भरिल्ल्या उदकाक लागून काँग्रेसीच्या फुडाऱ्यांनी भाजपाचेर टिका केल्या. स्मार्ट सिटीची कामां कशी चलता तें सरकारान गोंयच्या सगळ्या लोकांक दाखोवचें अशें काँग्रेसीचे प्रदेशाध्यक्ष अमित पाटकार हांणी सांगलें. राज्यांतल्या सगळ्या वाठारांतल्या लोकांक पणजे हाडून भाजपाचे उदरगतीचो हुंवार कसो आसा तें दाखोवचें अशेंय तांणी सांगलें. जाल्यार आयज पणजीत 1000 कोटी रुपया खर्च करुन केल्ल्या उदरगतीच्या कामांचो ट्रेलर पळोवपाक मेळ्ळो अशी टिका विरोधी पक्षाचे फुडारी युरी आलेमाव हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
